Navigation

Inhaltsbereich

  • Erste Mitteilung
  • Neuen Beitrag einfügen
Per la votaziun chantunala dal pievel da dumengia, ils 22 da settember 2013, che cuntegneva ina dumonda decisiva, ston las vuschs vegnir verifitgadas d'uffizi. La regenza ha ordinà oz mardi da dumbrar anc ina giada las vuschs da la dumonda decisiva.

Tenor la lescha davart ils dretgs politics en il chantun Grischun sto il resultat total provisoric eruì a chaschun d'ina votaziun vegnir verifitgà d'uffizi, sche la differenza tranter las vuschs affirmativas e las vuschs negativas è pli pitschna che 0,3 pertschient dals cedels da votar consegnads valaivels. La dumengia da votaziun dals 22 settember 2013 èn vegnidas acceptadas cleramain tant l'iniziativa chantunala dal pievel "Gea ad electricitad netta senza forza electrica da charvun" sco er la cuntraproposta dal cussegl grond "Naginas novas investiziuns en ovras electricas a charvun, sche l'emissiun da CO2 na po betg vegnir reducida considerablamain". Per la dumonda decisiva – "En cas che tant l'iniziativa dal pievel sco er la cuntraproposta vegnan acceptadas: Duai l'iniziativa dal pievel u la cuntraproposta entrar en vigur?" – ha la chanzlia chantunala communitgà il suandant resultat total provisoric sin basa dals resultats che las vischnancas han transmess electronicamain al chantun: 24 650 vuschs a favur da l'iniziativa, 24 526 vuschs a favur da la cuntraproposta. Cun ina differenza da 124 vuschs èn ademplidas las premissas per ina verificaziun d'uffizi. Quai sin fundament da la valur da toleranza da 147,5 vuschs (0,3 pertschient da 49 176 vuschs).

La regenza ha incumbensà oz la chanzlia chantunala da dumbrar anc ina giada las vuschs. Las vuschs vegnan dumbradas, suenter ch'il material da votaziun da las vischnancas è arrivà tar la chanzlia chantunala. Represchentantas e represchentants dal comité d'iniziativa han la pussaivladad d'observar la verificaziun. Il resultat vegn communitgà publicamain. 
 

Infurmaziuns:
Walter Frizzoni, vicechancelier, tel. 081 257 22 22


Gremi: regenza
Funtauna: rg chanzlia chantunala dal Grischun
Neuer Artikel