Differentas intervenziuns parlamentaras dals ultims onns pretendan che las contribuziuns chantunalas a las scolas medias privatas stoppian vegnir augmentadas. Motivada vegn questa pretensiun cun il fatg che pervia da la sanaziun da la scola chantunala grischuna stoppia vegnir adattada la pauschala d'investiziun a las scolas medias privatas. Ultra da quai han las scolas medias privatas per regla damain scolaras e scolars en las singulas classas, e quai chaschuna custs da gestiun pli auts. La regenza ha tramess en consultaziun ina revisiun parziala da la lescha davart las scolas medias che integrescha quests giavischs.

Cun la midada da las annadas cun ina quota da naschientschas pli flaivla dal stgalim secundar I al stgalim secundar II èn las scolas medias regiunalas pertutgadas d'ina ferma diminuziun dal dumber da scolaras e scolars. L'onn da scola 2013/14 frequentan circa 2600 giuvenils cun domicil en il Grischun ina scola media grischuna. Per ils proxims 10 onns sa mussa ina reducziun cuntinuada da var 600 scolaras e scolars da scola media. Las contribuziuns chantunalas a las scolas medias privatas vegnan perquai a sa diminuir. Quai è ina gronda sfida finanziala per questas scolas.
Sin fundament da quests fatgs pretendan differentas intervenziuns parlamentaras in augment da las contribuziuns chantunalas a las scolas medias privatas. Per quest intent è necessaria ina revisiun parziala da la lescha davart las scolas medias en il chantun Grischun (lescha davart las scolas medias; DG 425.00). Per consequenza dals custs per la sanaziun da la scola chantunala grischuna a Cuira stoppian las contribuziuns vegnir adattadas. Ultra da quai stoppia vegnir resguardada la media dal dumber da scolaras e scolars ch'è per regla pli bassa en las classas da las scolas medias privatas che en la scola chantunala. L'augment da las contribuziuns duai plinavant garantir er en il futur la repartiziun regiunala da las scolas medias che sa basa sin l'art. 89 al. 3 da la constituziun chantunala (DG 110.100).
Cun questa consultaziun explitga la regenza co che las intervenziuns parlamentaras per augmentar las contribuziuns chantunalas a las scolas medias privatas duain vegnir realisadas.

Ulteriurs puncts dal project da consultaziun
Cun la revisiun parziala vegn stgaffida la basa legala per che las scolas medias che porschan maturitads bilinguas en las linguas chantunalas survegnan en l'avegnir ina indemnisaziun speziala, e per ch'i possian vegnir manadas scolas medias d'informatica. Sch'igl existan cunvegnas correspundentas e per promover uffants talentads ed il sport, duai er vegnir permess da frequentar scolas medias extrachantunalas. Plinavant duain daventar pussaivlas mesiras da sustegn per scolaras e scolars che han in basegn spezial da promoziun e che frequentan ina scola media. E la finala duai vegnir adattada la terminologia da las disposiziuns per las scolas medias commerzialas a quella da la lescha federala davart la furmaziun professiunala.
Cun las medemas supposiziuns concernent il dumber da scolaras e scolars chaschuna la nova moda da calcular entaifer la perioda da planisaziun 2016 fin 2022 custs supplementars annuals da var 3,5 milliuns francs envers la moda da calcular actuala. Questas expensas sa chattan – pervia dal regress dal dumber da scolaras e scolars – però sut la valur budgetada per l'onn chalendar 2013 da var 32,4 milliuns francs. 


Remartga:
La consultaziun dura fin ils 31 da december 2013. Ils documents respectivs pon vegnir consultads en l'internet sut www.gr.ch / Consultaziuns currentas. 


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: martin.jaeger@ekud.gr.ch  
- Hans Peter Märchy, dr. fil., manader da l'uffizi per la furmaziun media-superiura, tel. 081 257 61 66, e-mail: hans.peter.maerchy@ahb.gr.ch  
 

Gremi: regenza
Funtauna: rg chanzlia chantunala dal Grischun