Per la quarta giada dapi l'onn 2006 sa participescha il chantun Grischun ad in'enquista online che vegn realisada en l'entira Svizra e che vul eruir, quant cuntents che las utilisadras ed ils utilisaders èn cun ils portals d'internet chantunals. Fin la fin da december 2013 pon persunas interessadas sa participar sin www.gr.ch a l'enquista davart il e-government.

Quant cuntents èn las burgaisas ed ils burgais cun ils portals d'internet dals chantuns? L'institut per psicologia da l'universitad da Basilea emprova da sclerir questa dumonda. Suenter ils onns 2006, 2008 e 2011 ha lieu quest onn ina nova enquista online davart quest tema. Participads èn puspè tut ils 26 chantuns svizzers. La finamira è in studi naziunal da valitaziun e da cumparegliaziun che dat als chantuns indizis per sviluppar vinavant lur portals d'internet sin ina basa scientifica.
Sut www.gr.ch pon persunas interessadas valitar fin ils 20 da december 2013 la purschida online dal chantun Grischun. L'enquista stat a disposiziun en tut las trais linguas chantunalas. Plinavant han ins la pussaivladad da sa participar a la concurrenza per in iPhone 5, per tschintg iPod Shuffle dad Apple e per tschintg bons d'Amazon. Il studi vegn publitgà il favrer 2014.


Gremi: chanzlia chantunala dal Grischun
Funtauna: rg chanzlia chantunala dal Grischun