A Küblis ha lieu sonda, ils 19 d'october 2013, l'ultima concurrenza dals gieus da sport da la ARGE ALP 2012/2013. Passa 120 uffants e giuvenils en la vegliadetgna tranter 10 e 15 onns sa mesiran en il raiver sportiv.
Quai è il final da l'onn da sport 2012/2013 da la Cuminanza da lavur da las regiuns alpinas (ARGE ALP). A Küblis ha lieu la concurrenza da l'ultima da totalmain nov disciplinas da sport specificas per las Alps sonda, ils 19 d'october 2013, numnadamain il raiver sportiv. Quasi tut ils pajais, las regiuns ed ils chantuns da la ARGE ALP èn preschents cun ina selecziun da cader en la halla da raiver dal CAS a Küblis. Passa 120 dals megliers raividers sportivs en la vegliadetgna da 10 fin 15 onns dal Grischun, da la Baviera, da Salzburg, da Son Gagl, dal Tirol dal sid, dal Tessin, dal Tirol, dal Trentino e dal Vorarlberg èn annunziads. Cun il raiver sportiv serra l'onn da project, suenter è enconuschent il victur total. Sin il rang 1 da la valitaziun dals pajais stat actualmain la Baviera. Avant il di da concurrenza ha lieu venderdi, ils 18 d'october, a partir da las 19.00 en la scola media evangelica a Schiers la festa d'avertura dal raiver sportiv da la ARGE ALP 2013.
Las concurrenzas da sport annualas da la ARGE ALP èn fitg popularas. Il project curunà da success vegn manà da l'uffizi per la scola populara ed il sport dal chantun Grischun. Las concurrenzas han lieu decentralmain en ils pajais commembers da la ARGE ALP. Pervia dal grond success dal project è la conferenza da las scheffas e dals schefs da las regenzas da la ARGE ALP s'exprimida l'onn 2011 a favur d'ina cuntinuaziun fin l'onn 2017. Ils gieus d'enviern cuntegnan mintgamai ski alpin, hockey sin glatsch e patinadi artistic. Durant il semester da stad suondan ballape, in turnier da ballape per persunas cun e senza impediments, tir da sport, atletica leva, cursa d'orientaziun sco er raiver sportiv.
La cuminanza da lavur da las regiuns alpinas
La ARGE ALP ha l'intent d'approfundar la conscienza dad esser responsabel per il spazi da viver alpin, ed ella vul sviluppar vinavant questa conscienza en moda persistenta per il bain da las abitantas e dals abitants. A la cuminanza da lavur, ch'è vegnida fundada l'onn 1972 en il Tirol, appartegnan diesch pajais federativs, regiuns e chantuns da quatter stadis. Commembers èn ils chantuns svizzers Grischun, Son Gagl e Tessin, ils pajais federativs austriacs Salzburg, Tirol e Vorarlberg, il pajais federativ tudestg Baviera sco er las regiuns talianas Tirol dal Sid, Trentino e Lumbardia. Presidiada vegn la ARGE ALP mintgamai per in onn d'in da ses commembers. Actualmain è quai il Trentino.
Remartga:
Ulteriuras infurmaziuns sut:
www.argealp-sport.org e
www.rzgr.ch/argealp
Infurmaziuns:
Beat Tschalèr, uffizi per la scola populara ed il sport dal Grischun, tel. 081 257 27 56, e-mail
Beat.Tschaler@avs.gr.ch
Gremi: uffizi per la scola populara ed il sport dal Grischun
Funtauna: rg chanzlia chantunala dal Grischun