A l'exposiziun mundiala da l'onn 2015 a Milaun vul il Grischun sa mussar da sia meglra vart. Il chantun duai vegnir percepì sco lieu attractiv en secturs-clav impurtants. Partenaris interessads èn envidads da sa participar a la preschentaziun. 

Dal 1. da matg fin ils 31 d'october 2015 ha lieu a Milaun l'exposiziun mundiala cun il tema "Nutrir il planet, energia per la vita". La manifestaziun svizra sut la direcziun da Preschientscha Svizra, ch'è ina partiziun dal departament federal d'affars exteriurs, è ina schanza unica da preschentar la Svizra cun sia diversitad culturala e natirala, cun sia capacitad da perscrutaziun e cun sia forza innovativa, en spezial en il sectur dal nutriment. L'exposiziun mundiala ha lieu directamain davant las portas dal Grischun. A l'Expo Milaun 2015 vegnan spetgads var 20 milliuns visitadras e visitaders. 75 pertschient vegnan a derivar da l'Italia, dals 25 pertschient restants stgars la mesadad da la Svizra. Questa occurrenza gronda che dura 6 mais pussibilitescha al chantun da render enconuschent las fermezzas dal chantun Grischun ad in vast public talian ed internaziunal. En il rom da la debatta davart il preventiv da l'onn passà ha il cussegl grond approvà per quest intent in credit d'impegn da 2 milliuns francs per ils proxims 3 onns. La finamira è quella da cuntanscher il meglier effect extern ed intern ch'è pussaivel en quest rom finanzial. Quai cun la participaziun da partenaris politics, instituziunals e commerzials dal chantun. En il center stat l'intenziun che la publicitad taliana, en spezial quella da l'Italia dal nord, percepeschia il chantun Grischun sco vischin simpatic che ha purschidas turisticas, culinaricas e culturalas persvadentas sco er in'economia innovativa e cosmopolitica cun bunas cundiziuns generalas. Ultra da quai duain vegnir eruidas pussaivladads, co che la collavuraziun transcunfinala cun l'Italia dal nord po vegnir approfundada tras mesiras adattadas a chaschun da l'Expo Milaun 2015. 

Preschentaziun cuminaivla da quatter chantuns
A l'Expo Milaun 2015 sa preschenta il Grischun ensemen cun ils chantuns Tessin, Uri e Vallais, cun ils quals i vegn gia tgirada ina stretga cooperaziun en il rom dal program San Gottardo. Cuminaivlamain vegn concepì in local da 150 meters quadrat en il pavigliun svizzer, ed ensemen cun ils chantuns partenaris, ma er en moda autonoma vegnan organisadas occurrenzas, scuntradas e preschentaziuns. Cun la participaziun sco chantun partenari uffizial en il pavigliun svizzer 2015 e sin la turnea svizra uffiziala 2014 che porta il titel "Il Giro del gusto" ha il chantun survegnì il dretg d'utilisar per sai differentas localitads avant e durant l'Expo Milaun 2015. Questa pussaivladad han er ils partenaris interessads. Partenaris pussaivels dal turissem, da la cultura, da la perscrutaziun e da la furmaziun, da l'agricultura e da la selvicultura sco er da l'industria e dal mastergn èn vegnids orientads ier – a chaschun d'ina occurrenza d'infurmaziun a Cuira – davart il stadi actual dal project e davart las pussaivladads ch'i dat per la preschentaziun.

La direcziun operativa dal project da la preschientscha grischuna a l'Expo vegn surpigliada da Markus J. Haltiner da l'uffizi chantunal per economia e turissem. Plinavant po la regenza quintar cun ils servetschs da l'anteriur cusseglier guvernativ Claudio Lardi. El è pront da metter a disposiziun ses buns contacts cun l'Italia per questa missiun e represchenta il chantun en gremis strategics da la confederaziun e dals chantuns dal Gottard. A Claudio Lardi ha la regenza surdà in mandat correspundent. 


Fotografia agiuntada:
Maletgs dal pavigliun svizzer a l'Expo Milaun 2015.
Funtauna: DFAE, Preschientscha Svizra e nightnurse images