Navigation

Inhaltsbereich

  • Erste Mitteilung
  • Neuen Beitrag einfügen
En sia ultima sesida ha la regenza grischuna tractà diversas fatschentas communalas e regiunalas. 

Da vischnancas e da regiuns 
  • Flem: Per il project "Eveniment global Flem 2020: Patrimoni mundial da l'UNESCO ‹Arena tectonica Sardona›" vegn garantida a la vischnanca da Flem ina contribuziun da totalmain 380 000 francs en il rom da la nova politica regiunala (NPR) (mintgamai per la mesadad a quint da la confederaziun e dal chantun). Resalvada resta la concessiun dals credits necessaris tras il cussegl grond. Cun il project vegn prestada ina contribuziun per pudair percepir il patrimoni mundial da l'UNESCO "Arena tectonica Sardona" da la vart grischuna. Questa contribuziun duai gidar ad augmentar la creaziun da valurs turisticas en la destinaziun Flem Laax. Tar quest tema èn previs differents projects parzials. Sviluppadas vinavant vegnan er las premissas per in center da visita da l'UNESCO a Flem.
  • Val Müstair: Il project "Protecziun cunter bovas al campadi da Sta. Maria" che l'uffizi da guaud e privels da la natira ha inoltrà per incumbensa da la vischnanca da Val Müstair vegn approvà. I vegn garantida ina contribuziun da maximalmain 225 000 francs. Il project ha la finamira da reducir il privel da bovas tar il campadi ed a medem temp da betg pegiurar la situaziun da privel per il territori abità da Sta. Maria e per la via da l'Umbrail. I vegnan construids dus rempars d'ina autezza da 3,5 m e d'ina lunghezza totala da 150 m. 

Contribuziuns chantunalas a differentas instituziuns 
  • Crusch cotschna svizra: En il rom da sias pussaivladads finanzialas sustegna il chantun Grischun agids da svilup ed agids en cas da catastrofas a l'exteriur. A la Crusch cotschna svizra vegnan pajads 20 000 francs a favur dal project "Agid d'urgenza per las victimas dal taifun Haiyan sin las Filippinas".
  • Uniun "Lieu d'aventura Bernina": Per il project "Lieu d'aventura Bernina Glaciers" vegn garantida a l'uniun "Lieu d'aventura Bernina" ina contribuziun da totalmain 300 000 francs en il rom da la nova politica regiunala (NPR) (mintgamai per la mesadad a quint da la confederaziun e dal chantun). Resalvada resta la concessiun dals credits necessaris tras il cussegl grond. L'uniun collia divers purtaders da prestaziuns en il territori tranter Morteratsch (Puntraschigna) e Cavaglia (Puschlav) e furma l'interfatscha per in barat d'infurmaziuns e d'experientschas tranter las commembras ed ils commembers. Il project promova d'ina vart la collavuraziun surregiunala tranter l'Engiadin'ota ed il Puschlav e creescha da l'autra vart las premissas organisatoricas e tematicas tar il tema "glatschers" per augmentar la valur d'ina cuntrada natirala intacta.

Gremi: regenza
Funtauna: rg chanzlia chantunala dal Grischun
Neuer Artikel