Dapi il 1. d'october 2013 lavura Andrea Niklaus en il Grischun sco ambassadura chantunala per il program da prevenziun en il sport "cool and clean". La finamira da l'ambassadura è quella da motivar uniuns e federaziuns da sport da sa participar a "cool and clean". Ultra da quai sa drizza ella ad organisaturas ed organisaturs d'occurrenzas da sport ed a gestiunarias e gestiunaris da stabiliments da sport. Ils messadis centrals dal program duain vegnir rendids enconuschents en il sport grischun.

"cool and clean" è il program da prevenziun en il sport svizzer che s'engascha per in sport correct e net. Il messadi da "cool and clean" sa basa sin tschintg empermischuns (uschenumnads commitments), a las qualas las participantas ed ils participants s'obligheschan. "Cool" vul dir: 'Jau vi cuntanscher mias finamiras' e 'Jau ma deport correctamain'. "Clean" stat per 'Jau fatsch mias prestaziuns senza doping' e 'Jau renunziel a tubac ed a cannabis e sche jau baiv alcohol, fatsch jau quai cun responsabladad'. Vitiers vegn la tschintgavla empermischun che vegn fixada individualmain da las squadras. Tut las tschintg reglas da cumportament furman il rom per preschentaziuns, per lavuratoris e per il sustegn ch'il program porscha a las acturas ed als acturs da sport. L'ambassadura dal program Andrea Niklaus lavura ultra da quai tar grischun sport en la furmaziun dal cader da Giuventetgna e sport (G+S). La cumbinaziun cun G+S pussibilitescha da profitar da sinergias en la tgira da contacts. Il medem mument pon las valurs da "cool and clean" vegnir colliadas en moda ideala cun G+S ed integradas en la scolaziun da manadras e da manaders da G+S. 

Differentas furmas da sustegn
Dal program da prevenziun profiteschan actualmain pir 39 da var 700 uniuns da sport e differents champs en il chantun Grischun. Ussa duain s'annunziar dapli uniuns e federaziuns per gidar a purtar la filosofia da "cool and clean". Sustegnidas vegnan ellas cun material didactic sco sets da gieus, videos e broschuras d'infurmaziun ch'èn adattadas per giuvenils sco er tras la cussegliaziun da l'ambassadura chantunala. Sch'ina uniun sa decida da sa participar, survegn ella divers meds auxiliars e documents per realisar las acziuns da prevenziun. Tgi che annunzia sia squadra u sia uniun ultra da quai per la concurrenza "Sport senza fim" po gudagnar in premi da fin 5000 francs. 

Occurrenzas da sport e stabiliments da sport senza fim
Ultra da las manadras e dals manaders da sport en las uniuns ed en las federaziuns tutgan er organisaturas ed organisaturs d'occurrenzas da sport sco er gestiunarias e gestiunaris da stabiliments da sport tar la gruppa en mira dal program. Cun lur engaschament gidan ellas ed els a realisar occurrenzas e stabiliments senza fim ed ad observar las disposiziuns per la protecziun da la giuventetgna da l'alcohol e mussan ch'ellas ed els vulan in sport correct e net. Tar la realisaziun da las mesiras vegnan er ellas ed els sustegnids cun material d'infurmaziun e cun cussegliaziuns.
Il program "cool and clean" vegn purtà da Swiss olympic, da l'uffizi federal da sport e da l'uffizi federal da sanadad publica e finanzià dal fond per la prevenziun dal tubachissem. 
 

Remartga:
Ulteriuras infurmaziuns vegnan purschidas sut www.coolandclean.ch e www.gr.ch / uffizi per la scola populara ed il sport / link.
Annunzias pon vegnir fatgas sut www.coolandclean.ch  
 

Fotografia agiuntada: Andrea Niklaus, ambassadura dal program "cool and clean" 
 

Infurmaziuns:
- Andrea Niklaus, ambassadura da "cool and clean", grischun sport, tel. 081 257 31 02, e-mail andrea.niklaus@avs.gr.ch  
- Thierry Jeanneret, manader da grischun sport, tel. 081 257 27 51, e-mail thierry.jeanneret@avs.gr.ch  
 

Gremi: uffizi per la scola populara ed il sport
Funtauna: rg uffizi per la scola populara ed il sport