La regenza grischuna ha nominà Daniel Buschauer sco nov manader da l'uffizi d'agricultura e da geoinfurmaziun. El vegn a manar l'uffizi a partir dal 1. da schaner 2014.

La regenza grischuna ha nominà Daniel Buschauer, 51 onns, inschigner da cultura diplomà SPF ed inschigner geometer patentà sco nov manader da l'uffizi. Buschauer lavura dapi l'onn 2004 en l'uffizi d'agricultura e da geoinfurmaziun, dapi l'onn 2011 sco manader da la partiziun "meglieraziuns da structura" e sco substitut dal manader da l'uffizi. Avant sia entrada tar l'administraziun chantunala ha Buschauer lavurà passa 10 onns en l'economia privata. El remplazza Aurelio Casanova che vegn a surpigliar per ils 31 da december 2013 – suenter 12 onns sco manader da l'uffizi d'agricultura e da geoinfurmaziun – ina nova sfida sco president da la vischnanca fusiunada dad Ilanz/Glion.

Ensemen cun la confederaziun è l'uffizi d'agricultura e da geoinfurmaziun responsabel per exequir la politica agrara, per realisar las meglieraziuns da structura en l'agricultura sco er per survegliar la mesiraziun uffiziala. Ultra da quai maina l'uffizi il sistem d'infurmaziun geografica da l'administraziun. Il manader da l'uffizi è suttamess directamain al schef dal departament d'economia publica e fatgs socials e maina in team da circa 40 collavuraturas e collavuraturs. 
 

Fotografia agiuntada: Daniel Buschauer, nov manader da l'uffizi d'agricultura e da geoinfurmaziun 
 

Infurmaziuns:
president da la regenza Hansjörg Trachsel, departament d'economia publica e fatgs socials, tel. 081 257 23 01, e-mail: Hansjoerg.Trachsel@dvs.gr.ch  
 

Gremi: regenza
Funtauna: rg chanzlia chantunala dal Grischun