Navigation

Inhaltsbereich

  • Erste Mitteilung
  • Neuen Beitrag einfügen
Per la terza giada curt avant l'entrada en vigur d'ina fusiun da vischnancas è la regenza sco autoritad da surveglianza sa fatschentada cun ina vischnanca burgaisa. La regenza constatescha che la vischnanca burgaisa da Glion na dastga betg transferir sias valurs da facultad sin in'associaziun burgaisa.

Cun la brev dals 3 da december 2013 ha la suprastanza da la vischnanca burgaisa da Glion envidà las burgaisas ed ils burgais ad ina radunanza fixada sin ils 16 da december 2013. Ina tractanda è tranter auter stada la fundaziun formala d'ina associaziun burgaisa cun il transferiment immediat da tut las activas e passivas da la vischnanca burgaisa da Glion sin l'associaziun. A medem temp ha la suprastanza da la vischnanca burgaisa proponì a la radunanza da burgais d'approvar in sboz dals statuts per l'associaziun sco er da dissolver la vischnanca burgaisa.

Cunter questa intenziun d'externalisar valurs da facultad intervegn la regenza. A la vischnanca burgaisa da Glion vegni scumandà da transferir sia facultad sin in'associaziun burgaisa. La situaziun giuridica permetta numnadamain mo d'externalisar valurs da facultad sin in'associaziun burgaisa, sche la vischnanca politica fusiunada n'ha pli nagina vischnanca burgaisa. A Glion n'è quai dentant betg il cas, perquai ch'i vegn a dar ina nova vischnanca burgaisa en la vischnanca che fusiunescha per il 1. da schaner 2014. La legislaziun chantunala respectiva è vegnida communitgada repetidamain a la vischnanca burgaisa da Glion ed a las autras vischnancas burgaisas ch'èn pertutgadas dal project da fusiun. L'uffizi dal register funsil da Glion vegn incumbensà da refusar eventualas dumondas da transferir sin in'associaziun burgaisa immobiglias ch'èn en proprietad da la vischnanca burgaisa da Glion.

Plinavant ha la regenza constatà che la vischnanca burgaisa da Glion na po er per motivs formals prender nagins conclus correspundents. Actualmain consista la suprastanza da la vischnanca burgaisa mo d'in unic commember da suprastanza, uschia ch'ella na po insumma gnanc far propostas legitimas a la radunanza. 
 

Infurmaziuns:
- cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail: barbara.janom@dfg.gr.ch  
- Thomas Kollegger, manader da l'uffizi da vischnancas, tel. 081 257 23 81, e-mail: thomas.kollegger@afg.gr.ch  
- Georg Aliesch, manader da la partiziun "surveglianza da las vischnancas", uffizi da vischnancas, tel. 081 257 32 20, e-mail: georg.aliesch@afg.gr.ch  
 

Gremi: regenza
Funtauna: rg chanzlia chantunala dal Grischun
Neuer Artikel