Venderdi, ils 17 da schaner 2014, vegn averta uffizialmain la nova stalla da muvel grond dal center da furmaziun e cussegliaziun agricula Plantahof a Landquart. Entaifer in onn èn las localitads veglias ed isadas vegnidas remplazzadas tras in nov stabiliment modern.

Suenter ch'il cussegl grond ha approvà il credit d'impegn da 7 milliuns francs en sia sessiun d'october 2010, ha gì lieu la badigliada mez favrer 2013. Suenter in temp da construcziun intensiv da mo 10 mais po la nova stalla da muvel grond ussa vegnir averta cun in act festiv. Il temp dals uigls vegls da l'onn 1964, nua ch'ins rentava il muvel, è passà. Ils uigls vegls èn vegnids remplazzads tras uigls libers moderns e clers che correspundan als basegns dals animals cun secturs da scolaziun generus.
La scolaziun e la furmaziun supplementara èn fitg impurtantas al Plantahof. Quel è daventà per puras e purs da las direcziuns da producziun las pli differentas, dentant er per gruppas da visitadras e da visitaders che n'èn betg da chasa en l'agricultura, in center da cumpetenza per la tratga da muvel e per l'economia d'alp.

La nova stalla da muvel grond serva sco stalla da scolaziun e d'experiment
La nova stalla da muvel grond porscha plazza a 160 envernantas. Il stabiliment sa distingua tras ina moda da construcziun funcziunala e persistenta. L'apparientscha fascinescha tras furmas cleras. Uigls che correspundan als basegns dals animals e locals da scolaziun moderns èn colliads bain sut in tetg. La pussaivladad da metter en uigl differentas gruppas d'animals permetta da realisar experiments pratics per la scolaziun e per la cussegliaziun.
En ils locals da scolaziun pon vegnir instruidas gruppas pli pitschnas e pli grondas generalmain u specificamain cun meds auxiliars moderns. Igl è er pussaivel d'organisar curs da perfecziunament naziunals ed internaziunals cun differentas spezialistas e spezialists per l'allevament d'animals. Per visitadras e visitaders che n'èn betg da chasa en l'agricultura daventa l'invista da la mulschera generusa in'aventura.
Las surfatschas dal tetg ch'èn drizzadas vers sid èn vegnidas dadas en locaziun ad in gestiunari d'implants fotovoltaics. L'implant ha ina prestaziun da circa 170 kWp. Quai correspunda al consum d'electricitad da var 50 fin 60 chasadas per onn.


Remartga:
Las collavuraturas ed ils collavuraturs da las medias èn envidads a la festa d'avertura venderdi, ils 17 da schaner 2014, a las 9.30. Preschents èn il president da la regenza dr. Mario Cavigelli ed il cusseglier guvernativ Hansjörg Trachsel. Program da la festa d'avertura.


Fotografia agiuntada: La nova stalla da muvel grond dal center da furmaziun e cussegliaziun agricula Plantahof. Indicaziuns tecnicas da la stalla e las fotografias pon vegnir empustadas per e-mail sut info@hochbauamt.gr.ch. 


Infurmaziuns:
- Markus Dünner, architect chantunal, uffizi da construcziun auta, tel. 081 257 36 31, e-mail: Markus.Duenner@hba.gr.ch  
- Peter Küchler, directur dal Plantahof, tel. 081 257 60 01, e-mail: Peter.Kuechler@plantahof.gr.ch  


Gremi: uffizi da construcziun auta dal Grischun
Funtauna: rg uffizi da construcziun auta dal Grischun