Cuntegn da la pagina

Il register funsil electronic vegn sviluppà vinavant

  • Erste Mitteilung
  • Neuen Beitrag einfügen
La regenza grischuna ha deliberà la missiva concernent ina revisiun parziala da la lescha introductiva tar il cudesch civil svizzer per mauns dal cussegl grond. Tenor la missiva vegn meglierada la gestiun dal register funsil electronic e simplifitgada l'invista dal register funsil.

Tras la revisiun parziala da la lescha introductiva tar il cudesch civil svizzer proponida da la regenza duai vegnir stgaffida la basa per sviluppar vinavant il register funsil informatisà, sco quai ch'igl è vegnì fixà da la confederaziun. La confederaziun dat pia als chantuns la pussaivladad da publitgar en l'internet ina part da las datas dal register funsil ch'èn accessiblas publicamain. Tenor la missiva da la regenza publitgescha il chantun da nov en l'internet las datas dal register principal che pon vegnir consultadas senza stuair cumprovar in interess. Quai èn la designaziun e la descripziun dal bain immobigliar, il num da la proprietaria u dal proprietari, la furma da proprietad e la data d'acquist. Per motivs da la protecziun da datas vala il suandant: Las consultaziuns ston sa referir a bains immobigliars, ed il dumber da consultaziuns per di via internet è limità. Ils access vegnan protocollads automaticamain, ed ils protocols vegnan mess en salv durant 1 onn.

Cun la revisiun da la lescha vegn plinavant stgaffì in portal d'infurmaziun electronic che n'è dentant betg public. Il dretg d'utilisaziun han persunas da notariat, geometras e geometers, autoritads, bancas, la Posta, cassas da pensiun, assicuranzas sco er advocatas ed advocats. Il portal d'infurmaziun electronic permetta a questas gruppas d'utilisadras e d'utilisaders da consultar tut las datas dals bains immobigliars da l'entir chantun en in lieu central. Obstachels administrativs e chargias administrativas vegnan uschia reducids. Sco ulteriura novaziun vegn – tenor la proposta da la regenza – admessa la correspundenza electronica cun ils uffizis dal register funsil. Las fatschentas immobigliaras ed ipotecaras tranter ils uffizis dal register funsil, ils notariats e las bancas pon vegnir liquidadas en moda pli simpla. 

Infurmaziuns actualas
Ultra d'effectuar questas mesiras tecnicas gida la revisiun er a meglierar la funcziun da publicitad dal register funsil. Ils uffizis dal register funsil survegnan tras la nova lescha d'ina vart in instrumentari effizient per stizzar en il register funsil inscripziuns che han pers lur impurtanza. Da l'autra vart ston els menziunar da nov tscherts causals en il register funsil, sco p.ex. restricziuns da la proprietad dal dretg public. Persunas privatas, l'administraziun e l'economia survegnan infurmaziuns fidadas ed actualas davart bains immobigliars. Ulteriuras novaziuns èn: La durada d'uffizi per las administraturas ed ils administraturs dal register funsil vegn abolida. Er vegni desistì da publitgar transferiments da proprietad da bains immobigliars tras in'affischa publica en la vischnanca respectiva. Tras la publicaziun da las datas en l'internet na dovri betg pli l'affischa a l'uschenumnada tavla naira.

Il cussegl grond vegn a tractar questa fatschenta en la sessiun d'avrigl 2014. 
 

Infurmaziuns:
cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01, e-mail: Hansjoerg.Trachsel@dvs.gr.ch  
 

Gremi: regenza
Funtauna: rg chanzlia chantunala dal Grischun
Neuer Artikel