Cuntegn da la pagina

Il cumissari da la regenza per Roveredo rapporta

  • Erste Mitteilung
  • Neuen Beitrag einfügen
La regenza ha prendì enconuschientscha dal rapport dal cumissari da la regenza per la vischnanca da Roveredo. Schebain che l'abilitad d'agir instituziunala da las autoritads è puspè dada, resta la situaziun politica difficila e precara. Ulteriuras mesiras dal dretg da surveglianza na s'imponan betg per entant.

Cun il conclus da la regenza dals 29 da schaner 2013 ha la regenza nominà advocat dr. Lorenzo Anastasi, anteriur president da la dretgira administrativa dal chantun Tessin, sco cumissari da la regenza per la vischnanca da Roveredo. Questa mesira dal dretg da surveglianza è s'imponida, perquai ch'ils 23 da schaner 2013 avevan demissiunà per immediat il president communal e dus ulteriurs commembers da la suprastanza, uschia che l'abilitad da decider e d'agir da l'organ executiv n'era betg pli dada. La finamira prioritara da la mesira era quella da restabilir la cumplettezza da la suprastanza communala e da garantir sia abilitad d'agir e da decider fin las elecziuns substitutivas resp. fin l'entrada en uffizi dals commembers da la suprastanza elegids. L'incarica dal cumissari da la regenza era limitada fin quest termin. A medem temp è il cumissari da la regenza vegnì envidà da far in rapport per mauns da la regenza suenter avair terminà sia incumbensa.

Suenter che la suprastanza communala è puspè vegnida cumplettada en las elecziuns substitutivas dals 27 d'october 2013, ha il cumissari da la regenza preschentà ses rapport. En il rapport vegni prendì posiziun davart differents secturs che han chaschunà discussiuns e dispitas durant l'activitad dal cumissari da la regenza (29 da schaner fin 7 da november 2013).

Tenor la valitaziun dal cumissari da la regenza accentuescha la renunzia da duas partidas da sa participar a la politica communala actuala il foss politic che traversa la vischnanca. Sch'i na reussiss betg da puspè chattar ina buna enclegientscha tranter las partidas politicas e da restabilir la confidenza vicendaivla ed il respect necessari, dastgassan las dispitas e la perdita da confidenza en la politica communala chaschunar ulteriurs conflicts almain fin las elecziuns cumplessivas l'atun 2014. Ina soluziun persistenta per las difficultads vesa il cumissari da la regenza definitivamain en la fusiun da la Mesolcina che stat en discussiun. Questa fusiun vegn probablamain a meglierar fundamentalmain l'avegnir da la vischnanca.
 

Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail: barbara.janom@dfg.gr.ch  
 

Gremi: regenza
Funtauna: rg chanzlia chantunala dal Grischun
Neuer Artikel