Sin invit da la regenza grischuna visita la regenza dal chantun Turgovia oz e damaun il chantun Grischun.

A chaschun da sia visita dal chantun Grischun vegn la delegaziun da Turgovia manada dal president da la regenza Bernhard Koch. El vegn accumpagnà da dunna cussegliera guvernativa Monika Knill sco er dals cussegliers guvernativs Claudius Graf-Schelling e Jakob Stark.

Retschavids vegnan ils giasts oz suentermezdi dal president da la regenza Mario Cavigelli en la chasa grischa a Cuira. Alura suonda ina visita cuminaivla da la catedrala da Cuira restaurada. Damaun avantmezdi è sin il program in'excursiun da las duas regenzas chantunalas a Flem.

La visita da la regenza dal chantun Turgovia serva en emprima lingia a tgirar las relaziuns amicablas ed a barattar experientschas sin ils champs da la cultura, da l'economia e da la politica. 
 

Fotografias agiuntadas: Il president da la regenza Mario Cavigelli retschaiva en la chasa grischa a Cuira il president da la regenza da Turgovia Bernhard Koch (a dretga).

Las duas delegaziuns cun il president da la regenza Bernhard Koch (Turgovia) e Mario Cavigelli (Grischun), (entamez), davant la chasa grischa a Cuira.


Gremi: regenza
Funtauna: rg chanzlia chantunala dal Grischun