Cuntegn da la pagina

Il Grischun sco lieu da rait dal parc naziunal d'innovaziun en Svizra

  • Erste Mitteilung
  • Neuen Beitrag einfügen
Il chantun Grischun inoltrescha a la conferenza dals directurs chantunals da l'economia publica in dossier da candidatura per posiziunar il Grischun sco lieu da rait independent dal parc naziunal d'innovaziun en Svizra. Grazia a ses instituts da perscrutaziun renumads a Tavau ed a Landquart ha il chantun premissas idealas per sa posiziunar sco lieu da rait. 

Situaziun da partenza
La lescha federala davart la promoziun da la perscrutaziun e da l'innovaziun creescha la basa per constituir in parc naziunal d'innovaziun en Svizra cun in'orientaziun internaziunala. La conferenza dals directurs chantunals da l'economia publica (CDE) fa – per incumbensa da la confederaziun – las lavurs da concept per in parc naziunal d'innovaziun. Ella ha concludì che en las duas scolas politecnicas federalas (SPF) a Losanna ed a Turitg vegnan etablids dus uschenumnads centers da rait. Per cumplettar ils dus centers duain vegnir fixads – en ina procedura da selecziun manada da la CDE – plirs lieus regiunals da rait. Ils chantuns pon inoltrar fin la fin da mars 2014 lur propostas per in lieu da rait. Questas propostas vegnan evaluadas da la CDE e transmessas, sco concept consolidà, al departament federal d'economia, furmaziun e retschertga. La finamira cuminaivla è quella d'obtegnair fin mez 2015 las decisiuns politicas sin plaun federal, per pudair lantschar alura il manaschi dal parc naziunal d'innovaziun en Svizra. 

Finamiras dal parc naziunal d'innovaziun en Svizra
Il departament federal d'economia, furmaziun e retschertga vesa en il parc naziunal d'innovaziun en Svizra ina via per rinforzar la Svizra en la concurrenza internaziunala dals lieus e da las innovaziuns. Il parc naziunal d'innovaziun en Svizra duai colliar ils acturs da la scienza e da l'economia anc meglier en ina rait. Ultra da quai duain novs acturs (particularmain perscrutaders da l'exteriur en l'economia privata) vegnir chattads per la Svizra resp. sa domiciliar en Svizra. Per quest intent èn las incumbensas centralas dal parc naziunal d'innovaziun en Svizra quellas da metter a disposiziun las infrastructuras ("surfatschas da perscrutaziun e d'innovaziun") e da coordinar la cumparsa vers l'exteriur ("commerzialisaziun internaziunala"). Il parc naziunal d'innovaziun en Svizra è in project da generaziuns ed ha in orizont temporal da plirs decennis. 

La candidatura dal Grischun sco lieu da rait
Il chantun Grischun candidescha sco lieu da rait independent dal parc naziunal d'innovaziun en Svizra. La regenza ha deliberà in dossier da candidatura per mauns da la conferenza dals directurs chantunals da l'economia publica.

Ils instituts da perscrutaziun domiciliads en il Grischun a Tavau ed a Landquart possedan spezialistas e spezialists internaziunals ed èn renconuschids sin l'entir mund. Els èn colliads en moda excellenta cun interpresas internaziunalas e cun las scolas autas sco la SPF da Turitg. Cun agid d'ina collavuraziun sistematica tranter ils instituts da perscrutaziun – er grazia a la proximitad locala, a las plattafurmas da tecnologia optimalas ed a las infrastructuras correspundentas – reusseschi da crear las premissas cumpetitivas per las scienzadas ed ils scienzads, las qualas furman la basa per ina perscrutaziun excellenta.

Tant en la regiun da Landquart sco er a Tavau datti surfatschas ch'èn adattadas per constituir e per amplifitgar il lieu da rait dal parc naziunal d'innovaziun en Svizra. Ulteriuras surfatschas pon vegnir messas a disposiziun resguardond las disposiziuns da la planisaziun dal territori. Interpresas ch'èn domiciliadas en il Grischun sco er interpresas internaziunalas han signalisà – cun agid d'ina decleraziun d'intenziun – lur grond interess per il Grischun sco lieu da rait ed han garantì da collavurar per al constituir e per l'amplifitgar. 

Constituziun previsa
Per manar il parc naziunal d'innovaziun en Svizra duai esser responsabla ina instituziun purtadra naziunala. L'intent principal da questa instituziun èsi da sustegnair la colliaziun dals lieus en ina rait sco er da garantir la qualitad da las prestaziuns che vegnan furnidas sut la marca da tetg swiss innovation park (parc d'innovaziun en Svizra) e da commerzialisar quellas sin plaun naziunal ed internaziunal. Sco furma giuridica è previsa ina fundaziun da dretg privat. Per garantir la coordinaziun e l'ulteriur svilup dal Grischun sco lieu da rait sto vegnir fundada ina instituziun purtadra chantunala. Previsa è medemamain la furma d'ina fundaziun. Questa fundaziun duai garantir il transfer da tecnologia tranter las interpresas ed ils instituts da perscrutaziun sco er permetter ina collavuraziun optimala cun l'instituziun purtadra naziunala.

La realisaziun dal Grischun sco lieu da rait è da gronda impurtanza per l'economia publica. Tras l'attracziun dal parc d'innovaziun e tras la pli gronda cumpetitivitad pon vegnir mantegnidas e creadas plazzas da lavur e tras quai po il Grischun sco lieu economic vegnir rinforzà la lunga vista.

Ulteriuras infurmaziuns davart il Grischun sco lieu da rait chattais Vus en l'agiunta.
 

Infurmaziuns:
- cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01, e-mail: hansjoerg.trachsel@dvs.gr.ch  
- Eugen Arpagaus, manader da l'uffizi per economia e turissem, tel. 081 257 23 77, e-mail: eugen.arpagaus@awt.gr.ch  
 

Gremi: regenza
Funtauna: rg chanzlia chantunala dal Grischun
Neuer Artikel