Cuntegn da la pagina

Il chantun Grischun survegn ina nova lescha da promoziun dal sport

  • Erste Mitteilung
  • Neuen Beitrag einfügen
La regenza grischuna ha deliberà la missiva tar la nova lescha davart la promoziun dal sport e dal moviment (lescha da promoziun dal sport) dal chantun Grischun per mauns dal cussegl grond. Questa lescha duai servir sco nova basa per promover il sport en il Grischun.

L'impurtanza dal sport e dal moviment en la societad odierna giustifitgescha da reglar la promoziun dal sport sin il stgalim d'ina lescha. La basa ch'exista actualmain sin il stgalim d'ina ordinaziun deriva da l'onn 1974. Ella n'arriva betg pli da satisfar a las pretensiuns modernas envers la promoziun dal sport. La nova lescha da promoziun dal sport è concepida en moda concisa e dinamica per pudair tegnair quint er da svilups futurs. Ils detagls vegnan reglads en l'ordinaziun ed en in concept per promover il sport che vegn elavurà en moda interdepartamentala.
Cun la lescha da promoziun dal sport duai ultra da quai vegnir exequida la legislaziun federala per promover il sport ch'è entrada en vigur l'october 2012. L'ordinaziun duai ultra da quai er cuntegnair regulaziuns che van pli lunsch che la spira execuziun da la lescha federala.

Cun la lescha duain vegnir promovidas activitads da sport e da moviment dals umans en il Grischun. Per quest intent duai il chantun er pudair collavurar cun las vischnancas e cun terzas parts (oravant tut uniuns e federaziuns da sport). La lescha duai permetter al chantun oravant tut da realisar agens programs e projects en la promoziun dal sport e da sustegnair tals da terzas persunas cun cussegliaziun e cun coordinaziun, ma er cun contribuziuns finanzialas. En quest connex duain tut las fassettas dal sport (moviment, sport da massa, sport da prestaziun) vegnir resguardadas adequatamain e cun ils medems dretgs. Ina paisa speziala duai vegnir messa sin la promoziun dal sport d'uffants e da giuvenils sco er sin l'effect integrativ dal sport. Entant ch'il sport da scola obligatoric resta reglà en la legislaziun da scola, duai il sport da scola voluntar er pudair vegnir promovì en il rom da questa lescha.
La promoziun dal sport vegn finanziada sco fin ussa d'ina vart tras meds finanzials ordinaris e da l'autra vart tras la finanziaziun speziala per il sport.

En il rom da la procedura da consultaziun èn vegnidas inoltradas 38 posiziuns. Bleras da las propostas da meglieraziun han pudì vegnir integradas en il sboz da la lescha. Il cussegl grond vegn a tractar questa fatschenta en la sessiun da zercladur 2014. La revisiun da la lescha duai entrar en vigur il 1. da schaner 2015. 
 

Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: martin.jaeger@ekud.gr.ch  
- Andrea Stadler, secretaria dal departament d'educaziun, cultura e protecziun da l'ambient, tel. 081 257 27 11, e-mail andrea.stadler@ekud.gr.ch  
 

Gremi: regenza
Funtauna: rg chanzlia chantunala dal Grischun
Neuer Artikel