Cuntegn da la pagina

Communicaziun da la regenza dals 3 d'avrigl 2014

  • Erste Mitteilung
  • Neuen Beitrag einfügen
La regenza grischuna ha approvà l'augment dal cussegl turistic dal Grischun cun 2 commembers. Ultra da quai sustegna la regenza ina nova etappa per cumprar material rullant da la Viafier retica. Plinavant ha la regenza approvà projects da vias. 

Dus novs commembers en il cussegl turistic dal Grischun
Il cussegl turistic dal Grischun vegn engrondì. La regenza grischuna ha elegì per il sectur da l'infurmaziun e da la communicaziun Dania Gerhardt e per il sectur da l'organisaziun da viadis Rolf Schafroth sco commembers dal cussegl turistic dal Grischun. La perioda d'uffizi dura fin la fin da l'onn 2017. Dania Gerhardt è cussegliera d'administraziun e confundatura da l'interpresa da servetschs en la rait Amazee Labs ed Amazee Metrics ed è responsabla per las operaziuns principalas dad Amazee Labs. Rolf Schafroth è il vicepresident executiv e CEO da la Division Global Travel Services tar l'organisatur da viadis Kuoni. Uschia ha il cussegl turistic dal Grischun ussa en tut 9 commembers. Il president è prof. dr. Ernst A. Brugger, Turitg.
Il cussegl turistic dal Grischun ch'è vegnì fundà il cumenzament da l'onn cusseglia la regenza ed ils acturs turistics a sviluppar ulteriuramain las destinaziuns ed a crear projects innovativs (vesair communicaziun da la regenza dals 7 da schaner 2014).
Agiunta: Purtrets curts da Dania Gerhardt e da Rolf Schafroth

Approvà in'ulteriura etappa per cumprar nov material rullant da la Viafier retica
La regenza ha approvà la terza etappa repassada d'in concept per renovar la flotta da la Viafier retica (VR) cun nov material rullant. En il rom da questa etappa vegnan acquistads – per remplazzar ils vaguns da persunas che curseschan oz sin la lingia da l'Alvra – 6 cumposiziuns da l'Alvra ch'existan da mintgamai 6 vaguns e d'in vagun-locomotiva da la 1. classa. Ultra da quai vegnan cumprads 13 vaguns-locomotiva universals per las ulteriuras lingias da tschep da la VR. Ils custs d'investiziun importan 167,2 milliuns francs. Ils custs d'investiziun cun dretg d'indemnisaziun chaschunan tar la confederaziun e tar il chantun custs supplementars annuals da circa 7 milliuns francs. Per il chantun Grischun resulta ina cumpart da 20 pertschient u da circa 1,4 milliuns francs per onn. A partir da l'onn 2020 vegnan quests custs dentant cumpensads cumplainamain tras respargns e tras gudogns d'effizienza. 

Stgars 10 milliuns francs per l'avertura dal guaud
Per reparar vias da guaud existentas en il chantun ha la regenza concedì en tut 9 928 000 francs. Tras il project collectiv 2014 da differentas vischnancas vegnan renovads en tut circa 47 kilometers vias da guaud e vias da maschinas en tut las regiuns dal chantun. Uschia vegn meglierada l'avertura da circa 13 000 hectaras guaud. I vegnan fatgas mo investiziuns urgentas che servan a mantegnair las averturas dal guaud necessarias. Amplificaziuns e construcziuns novas sco er las lavurs da mantegniment currentas na fan betg part dal project. 

Lantschà la consultaziun tar la revisiun parziala da la lescha davart las vias
La regenza grischuna ha deliberà il sboz per ina revisiun parziala da la lescha davart las vias dal chantun Grischun per la consultaziun.
La lescha vertenta davart las vias dal chantun Grischun ch'è entrada en vigur il 1. da settember 2005 è sa cumprovada bain en general. Il motiv principal per la revisiun parziala planisada è il basegn da coordinar meglier las proceduras. Tenor il dretg vertent sto in project da vias vegnir permess regularmain da differentas autoritads. Sa basond sin leschas chantunalas pli novas duai la regenza vegnir autorisada da decider davart l'approvaziun d'in project da via e da conceder il medem mument tut las permissiuns necessarias. Vitiers vegnan tschertas optimaziuns ch'èn vegnidas fatgas sin proposta dals organs responsabels per l'execuziun da la lescha. Uschia è creschida ils ultims onns l'impurtanza da tscherts indrizs e stabiliments sin vias chantunalas. Rundellas, mesiras architectonicas per quietar il traffic u vials per midar direcziun vegnan tematisads e realisads pli e pli. Cun la revisiun parziala qua avant maun duai vegnir cumplettada correspundentamain la lescha davart las vias.
Ils documents da consultaziun pon vegnir consultads sut www.gr.ch / Rumantsch / Publicaziuns / Consultaziuns currentas. La consultaziun dura fin ils 3 da fanadur 2014. 

Fixà en l'ordinaziun las distanzas da tir per la chatscha
En l'ordinaziun da la regenza davart la chatscha èn vegnidas recepidas da nov las distanzas da tir maximalas ch'èn permessas da nov per ir a chatscha. Tar tirs da ballas importan quellas maximalmain 200 meters e tar tirs da ballins maximalmain 40 meters. Ultra da quai vegni fixà da nov sin il stgalim da l'ordinaziun, ch'ins dastga ir a chatscha d'utschels d'aua mo cun in chaun da chatscha che ha fatg l'examen e mo, sch'ins dovra ballins senza plum. La revisiun parziala da l'ordinaziun da chatscha entra en vigur il 1. da zercladur 2014. 

L'administraziun sa participescha a l'acziun "Bike to Work"
L'administraziun chantunala sa participescha l'onn 2014 danovamain a l'acziun "Bike to Work" da la Pro velo Svizra. La regenza ha surdà l'organisaziun a l'uffizi da sanadad. En il rom da questa acziun vegnan las collavuraturas ed ils collavuraturs envidads da sa participar ad in'equipa da quatter e da s'obligar da prender il velo per ir a lavurar, e quai durant almain la mesadad dals dis da lavur dal mais da zercladur. Pussaivla è er ina cumbinaziun tranter traffic public e velo. A chaschun da l'acziun da l'onn passà han 70 equipas da l'administraziun chantunala cun stgars 271 participantas e participants fatg tut en tut var 32 852 kilometers. 
 

Da vischnancas e da regiuns 
  • Soazza: La revisiun totala da la planisaziun locala, concludida da la vischnanca da Soazza ils 15 da mars 2012, vegn approvada cun resalvas. La zona d'edifizis d'abitar en il territori perifer "Scima Rivé" ch'è planisada vegn exclusa da l'approvaziun. Ina zona d'edifizis d'abitar en il territori "Cà d’Colomb" vegn approvada cun la cundiziun che en ina nova procedura dal plan d'utilisaziun ston vegnir fixadas prescripziuns utilas per la construcziun, per il regruppament dal terren e per l'avertura.
  • Riom-Parsonz: Il plan da zonas e plan general d'avertura 1:1000 "Dual" dals 19 da december 2013 che la vischnanca da Riom-Parsonz ha concludì, vegn approvà. Cun la planisaziun d'utilisaziun vegn creada ina zona d'edifizis d'abitar per emprimas abitaziuns en la dimensiun da totalmain circa 0,2 hectaras en la fracziun da Riom.
  • Sumvitg: Il plan da zonas 1:1000 midada, Laus, ch'è vegnì concludì ils 17 da december 2013 da la vischnanca da Sumvitg, vegn approvà.
  • Lavin: Il project "Detecturs per la lavina da Gonda" sur la vischnanca da Lavin vegn approvà. I vegn garantida ina contribuziun da maximalmain 375 000 francs. Il project gida a segirar la via principala.
  • San Vittore: Per la renovaziun da las fatschadas da la chasa parochiala vegn garantida al cumin-baselgia da San Vittore – en il rom da la tgira da monuments – ina contribuziun da maximalmain 31 600 francs.

Projects e mantegniment da las vias 
  • Cuira: Per construir in vial da bus sin la Via da Masans a Cuira da la citad anora sin il traject da la Kronengasse fin a la rundella da Masans vegn garantida ina contribuziun chantunala da maximalmain 294 000 francs. Il project da via sin ina da las axas da traffic las pli impurtantas da Cuira vegn realisà er en l'interess dal chantun sco patrun dal traffic regiunal. L'onn 2012 ha la regenza gia concedì ina contribuziun da 995 000 francs als custs da construcziun da l'emprima etappa tranter la Ringstrasse e la Giacomettistrasse.
  • Grüsch: La regenza ha approvà in nov trassé da la via chantunala da colliaziun a Valzeina. La nova via da colliaziun cumenza tar la punt sur la Landquart ad Überlandquart (plazza da parcar dal stabiliments da sport da Grüsch) e sbucca suenter 2,1 kilometers en la via existenta da Valzeina. Il nov trassé curra sin ils emprims 1,4 kilometers per gronda part per lung da la Sananggastrasse. Alura suonda el la via da guaud existenta fin ch'el traversa il Schranggabach en il territori dal Geissgaden. Ina punt da 64 meters lunghezza sur il Schranggabach è l'element central dal project da vias. Tras il nov trassé vegn meglierada considerablamain l'avertura da Valzeina e po vegnir augmentada la segirezza dal traffic. Suenter la realisaziun dal project vegn surdà il traject parzial actual da la via da Valzeina tranter l'access a la Alte Prättigauerstrasse ed il Geissgaden a la vischnanca da Grüsch sco proprietad e per il mantegniment.
  • Samignun: La regenza ha approvà il project da l'uffizi chantunal da construcziun bassa per ina nova construcziun d'ina basa per il mantegniment da las vias en la vischnanca da Samignun. Il bain immobigliar ch'è necessari per la construcziun nova cun ina surfatscha da 2836 meters quadrat sa chatta sin il territori da la fracziun da Plan ed è en possess dal chantun. Il territori cunfinescha directamain cun la Via da Samignun. Tras la construcziun nova da la basa per il mantegniment da las vias a Samignun-Plan vegnan meglieradas fermamain las relaziuns localas e las premissas per in servetsch da vias effizient ed economic. La basa existenta a Samignun-Laret na cuntenta betg pli a las pretensiuns actualas. Ultra da quai n'è la situaziun en la zona dal center dal vitg betg adattada per ina basa per il mantegniment da las vias.

Plinavant ha la regenza approvà 3,91 milliuns francs per lavurs da construcziun sin ils suandants trajects:
- via naziunala Partenz: projectaziun dal trassé dal sviament da Küblis
- via d'Almen: lavurs da cuvrida tranter Pratval ed Almen
- via dal Flüela: lavurs d'impressari e da cuvrida, Pedrawald – Tufflischbach
- via da la Muntogna da Schons: lavurs da cuvrida tranter Pazen e Farden 
 

Gremi: regenza
Funtauna: rg chanzlia chantunala dal Grischun
Neuer Artikel