Zum Seiteninhalt

Suenter il grev enviern vegnan controlladas las ovras da protecziun

  • Erste Mitteilung
  • Neuen Beitrag einfügen
Quest enviern han ils rempars da lavinas en il Grischun stuì resister a grevas chargias, damai ch'igl ha dà surproporziunalmain blera naiv. Ussa vegnan las ovras da protecziun pertutgadas suttamessas ad ina controlla detagliada per eliminar uschè svelt sco pussaivel eventuals donns. In nov video da la chanzlia chantunala mussa il selvicultur chantunal Reto Hefti sin in da ses girs da controlla en la Val S. Pieder.

Quest enviern hai dà surproporziunalmain blera naiv en las vals dal sid dal Grischun, en l'Engiadina ed en parts da la Surselva. Ils rempars da lavinas èn vegnids cuvrids per part u dal tuttafatg cun naiv. En tals cas vegn la situaziun controllada permanentamain dal spezialist d'ovras da protecziun da l'uffizi chantunal da guaud e privels da la natira (UGP) en stretga collavuraziun cun ils selviculturs da revier cumpetents. Mintga onn e spezialmain suenter quest grev enviern vegnan las ovras pertutgadas suttamessas ad ina controlla detagliada tras las persunas spezialisadas cumpetentas. En la gronda part dals cas è quai il selvicultur da revier da la vischnanca pertutgada. La controlla dal stadi vegn fatga sin fundament da las directivas prescrittas ch'èn vegnidas elavuradas dal UGP. Ils rapports da controlla vegnan tramess al spezialist responsabel dal UGP.
Il UGP registrescha il stadi da las ovras da protecziun controlladas en in cataster ch'è previs spezialmain per quai, l'uschenumnà cataster da las ovras da protecziun. Tut tenor urgenza vegnan las ovras reparadas immediatamain. Las reparaturas èn bain savens charas, però èsi absolutamain necessari d'eliminar quests donns per che las ovras possian ademplir lur incumbensa da protecziun envers la populaziun. Il patrun da construcziun respectiv, savens sa tracti da la vischnanca pertutgada, sto pajar ils custs che resultan. Per gronda part datti dentant in sustegn finanzial da la confederaziun e dal chantun. 
 
Remartga:
Il video davart quest tema stat a disposiziun sut www.gr.ch
 

Infurmaziuns:
- Reto Hefti, manader da l'uffizi da guaud e privels da la natira, tel. 081 257 38 51, e-mail reto.hefti@awn.gr.ch  
 

Gremi: uffizi da guaud e privels da la natira
Funtauna: rg uffizi da guaud e privels da la natira
Neuer Artikel