Cuntegn da la pagina

Communicaziun da la regenza dal 1. da matg 2014

  • Erste Mitteilung
  • Neuen Beitrag einfügen
La regenza grischuna ha approvà differentas revisiuns da planisaziuns localas communalas. 

Da vischnancas e da regiuns
  • Falera: La revisiun parziala da la planisaziun locala, concludida da la vischnanca da Falera il 1. d'october 2013, vegn approvada. Tras la revisiun parziala vegn determinada ina nova zona d'hotels en il sectur da la parcella nr. 1224. Il motiv per l'enzonaziun è l'engrondiment da l'hotel "La Siala".
  • Sagogn: La revisiun totala da la planisaziun locala, concludida da la vischnanca da Sagogn ils 31 d'october 2013, vegn approvada cun resalvas. En il rom da la revisiun totala aveva la vischnanca repassà la lescha da construcziun sco er tut ils plans d'utilisaziun.
  • Schiers: La revisiun parziala da la planisaziun locala, concludida da la vischnanca da Schiers ils 29 da november 2013, vegn approvada. Tras la revisiun parziala vegn stgaffida in zona d'industria da circa 2,6 hectaras en il territori "Ausser dem Sagensteg".
  • Schluein: La revisiun parziala da la planisaziun locala, concludida da la vischnanca da Schluein ils 18 d'october 2013, vegn approvada cun resalvas. La procedura d'approvaziun per ina zona d'hotels en il territori "Fry" vegn sistida, fin ch'igl è avant maun in project concret. Approvads vegnan in engrondiment da la zona da mastergn "Islas" per circa 3,2 hectaras sco er ina nova zona d'abitar da 0,2 hectaras en il territori "Claus", ch'era sistida fin ussa.
  • Seewis: La revisiun parziala da la planisaziun locala, concludida da la vischnanca da Seewis ils 13 da settember 2013, vegn approvada. La revisiun parziala cumpiglia adattaziuns minimalas da singuls meds da planisaziun. En il territori "Gätziloch" ha la vischnanca determinà ina nova zona per edifizis e stabiliments publics cun l'intent d'endrizzar là in deposit da laina communal. Al sidost dal vitg duai plinavant vegnir realisada ina plazza da volver per autos da posta.
  • Tumegl: La revisiun totala da la planisaziun locala, concludida da la vischnanca da Tumegl ils 31 d'october 2012, vegn approvada cun correcturas. Tras la revisiun totala vegnan repassads ils meds da planisaziun da la vischnanca da Tumegl ch'è naschida il 1. da schaner 2009 ord la fusiun da las anteriuras vischnancas da Tumegl, Veulden, Sched e Tràn. La revisiun totala cumpiglia tranter auter l'engrondiment da zonas d'edifizis d'abitar, la determinaziun d'ina zona da chasas da ricover cun la finamira da construir in center da sanadad en la fracziun Tumegl e la determinaziun d'ina zona d'hotels sco er ina zona per indrizs turistics sper la sutgera Veulden – Mutta en la fracziun Veulden.
  • Tschiertschen-Praden: La revisiun parziala da la planisaziun locala, concludida da la vischnanca da Tschiertschen-Praden ils 27 da mars 2014, vegn approvada. Tras la revisiun parziala vegn stgaffida ina zona d'hotels, a la quala vegnan attribuidas las parcellas dals dus hotels existents "Alpina" e "Gürgaletsch". L'hotel "Alpina" vegn renovà cumplettamain ed engrondì.
  • Valsot: Il plan da zonas 1:1000 "Plan da Muglin", concludì da la vischnanca da Valsot ils 2 da december 2013, vegn approvà. Tras la nova planisaziun d'utilisaziun vegn la zona da mastergn existenta en il territori "Plan da Muglin" engrondida per circa 1 hectara.
  • Partenz: Il plan directiv regiunal "Abitadi ed equipament", concludì da la corporaziun regiunala pro Partenz ils 15 da november 2012, vegn approvà cun resalvas. Ils princips davart il svilup dals abitadis ston vegnir repassads.
  • Engiadina bassa: Il plan directiv regiunal "Territoris da plazzas da lavur / mastergn", concludì da la Pro Engiadina bassa ils 13 da favrer 2014, vegn approvà cun resalvas.

Projects da vias
Ultra da quai ha la regenza approvà 3,868 milliuns francs per lavurs da construcziun sin ils suandants trajects:
- via da Claustra: lavurs d'impressari e da cuvrida, Claustra Rüefa – punt dal Talbach
- via sursilvana: lavurs da cuvrida, correcziun da la via, Rabius – Sumvitg
- via dal Partenz: lavurs da cuvrida Wolfgang – Seehorn
- via dal Scanvetg: lavurs d'impressari e da cuvrida, Pardielertobel – St. Peter 


Gremi: regenza
Funtauna: rg chanzlia chantunala dal Grischun
Neuer Artikel