Tras la midada da la lescha davart ils dis da paus publics duai vegnir tegnì quint da las relaziuns socialas odiernas.

La lescha davart ils dis da paus publics regla tge dis che valan en il Grischun sco dis da paus e che han perquai ina protecziun speziala. La lescha vertenta è però vegnida relaschada avant stgars 30 onns. Ina part da las disposiziuns ch'ella cuntegna na correspunda betg pli a la moda da viver actuala e duai perquai vegnir adattada a las relaziuns socialas odiernas. Uschia n'èsi per exempel betg pussaivel tenor il text da la lescha d'organisar occurrenzas da divertiment, represchentaziuns da teater u occurrenzas da sport durant auts firads (sco il venderdi sontg u la dumengia da Tschuncaisma). En la concepziun dal temp liber gioga per la populaziun en il fratemp – sper il paus e la reflexiun – er la scuntrada, il barat cultural e l'activitad sportiva durant ils firads ina rolla adina pli gronda. La regulaziun proponida duai tegnair quint da quest svilup. Occurrenzas che servan per exempel a la recreaziun, al sport u al divertiment duain pudair vegnir permessas – sut tschertas cundiziuns – er per auts firads. En il rom da las directivas da questa lescha duain las vischnancas survegnir las cumpetenzas da permetter occurrenzas sin lur territori communal durant auts firads, sche quellas na cuntrafan betg al senn da l'aut firà. Uschia vegni tegnì quint da l'autonomia communala e da las pretensiuns dal turissem.


Remartga:
La consultaziun dura fin ils 31 d'avust 2014. Ils documents pon vegnir consultads en l'internet sut www.gr.ch / Consultaziuns currentas.


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: martin.jaeger@ekud.gr.ch  
- Andrea Stadler, secretaria dal departament d'educaziun, cultura e protecziun da l'ambient, tel. 081 257 27 11, e-mail andrea.stadler@ekud.gr.ch  
 

Gremi: regenza
Funtauna: rg chanzlia chantunala dal Grischun