Navigation

Inhaltsbereich

  • Erste Mitteilung
  • Neuen Beitrag einfügen
Dacurt èn il cusseglier guvernativ Christian Rathgeb, schef dal departament da giustia, segirezza e sanadad, Walter Schlegel, cumandant da la polizia chantunala dal Grischun, e Daniel Spadin, secretari dal departament, sa scuntrads cun Gaudenz F. Domenig, president dal club da hockey da Tavau (HCD). Il tema da discussiun principal è stada la segirezza tar ils gieus da hockey sin glatsch a Tavau. Ils responsabels dattan in bun attestat als fans.

La discussiun ha mussà che la collavuraziun tranter il HCD e la polizia chantunala dal Grischun funcziuna bain. Tenor tuttas duas varts porta ella las finamiras giavischadas. Grazia a questa buna cooperaziun n'hai dà l'onn passà nagins incidents serius e tut ils participads tiran in facit positiv. Uschia n'han stuì vegnir pronunziads praticamain nagins scumonds d'entrar en il stadion u en tscherts areals. Ils circa 24 aspectaturs ch'èn pronts da duvrar violenza èn enconuschents a la polizia chantunala, ed il proceder consequent cunter ils paucs rowdies è sa cumprovà. Tar la gronda part dals gieus da hockey sin glatsch po la polizia chantunala perquai esser preschenta cun in pitschen dumber da polizists. 

In laud als fans ed al club da fans
La bilantscha positiva è er d'engraziar als fans exemplarics ed al club da fans dal HCD. Tras lur engaschi da blers onns procuran els ch'il sport stettia en il center e che la violenza n'haja nagina plazza en ils conturns da gieus da hockey sin glatsch en il Grischun. Grazia a las persunas incumbensadas per dumondas da hooligans exista in bun contact cun la polizia chantunala, ed ils aspectaturs ch'èn pronts da duvrar violenza pon vegnir identifitgads a temp. 

Adattaziuns dal concordat
Il concordat davart las mesiras cunter la violenza a chaschun d'occurrenzas da sport, al qual il chantun Grischun è sa participà l'onn 2009, vegn actualmain adattà. La missiva correspundenta duai vegnir preschentada al cussegl grond il cumenzament da l'onn 2015. Ina novaziun essenziala è in'obligaziun da permissiun per gieus da ballape e da hockey sin glatsch en las ligas supremas, cun la pussaivladad da conceder la permissiun sut cundiziuns. Tant ils responsabels dal chantun sco er la direcziun dal HCD èn da l'opiniun che questa obligaziun da dumandar ina permissiun saja da princip raschunaivla e ch'ella na duess dentant purtar naginas cundiziuns supplementaras tar gieus nunproblematics dal HCD. 
   

Infurmaziuns:
- cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  
- Gaudenz F. Domenig, president dal club da hockey da Tavau, tel. 079 402 99 29
 

Gremi: departament da giustia, segirezza e sanadad
Funtauna: rg departament da giustia, segirezza e sanadad
Neuer Artikel