Zum Seiteninhalt

Brain festival – in'acziun per la sanadad psichica

  • Erste Mitteilung
  • Neuen Beitrag einfügen
Malsognas psichicas èn frequentas e pertutgan mintga segunda persuna ina giada en sia vita. Co ch'ins rinforza la sanadad psichica e tge ch'i capita en noss tscharvè tar stress, depressiun, migrena, dependenza u demenza vegn mussà dals 2 fin ils 6 da zercladur 2014 al brain festival a Cuira, a Landquart ed a Poschiavo.

Al brain festival vegn declerà a giuven e vegl en ina moda interessanta e ludica il connex da la sanadad psichica e da las funcziuns dal tscharvè. En l'exposiziun "Brain bus" e "Tscharvè transibel" vegnan las aspectaturas ed ils aspectaturs a savair – a maun da preschentaziuns da computer e da multimedia sco er cun experiments – chaussas interessantas davart las funcziuns e las dischfuncziuns dal tscharvè e davart lur consequenzas eventualas per la sanadad psichica. Las exposiziuns vegnan accumpagnadas da spezialistas e da spezialists.
Il brain festival è vegnì inizià da l'uffizi da sanadad dal chantun Grischun. En il rom dal program grischun per la sanadad psichica èn il vast scleriment davart la sanadad psichica sco er la sensibilisaziun e la detabuisaziun da malsognas psichicas finamiras impurtantas da la promoziun da la sanadad en il Grischun (www.graubünden-bewegt.ch).

Il brain festival ha lieu sco suonda:
"Brain bus" e "Tscharvè transibel": 
  • glindesdi, ils 2 da zercladur 2014, da las 9.00 a las 18.00, Landquart, sin il Roter Platz tar la staziun, (tudestg)
  • mardi, ils 3 da zercladur 2014, da las 9.00 a las 18.00, Cuira, Gürtelstrasse 42, center da furmaziun per la sanadad ed ils fatgs socials (CSS), sut la staziun, (tudestg)
  • mesemna, ils 4 da zercladur 2014, da las 9.00 a las 17.00, Cuira, Gürtelstrasse 42, center da furmaziun per la sanadad ed ils fatgs socials (CSS), sut la staziun, (tudestg)
  • venderdi, ils 6 da zercladur 2014, da las 9.00 a las 18.00, Poschiavo, plazza communala, (talian)
"Brain cinema": 
  • mesemna, ils 4 da zercladur 2014, da las 18.00 a las 21.00, Cuira, Gürtelstrasse 42, center da furmaziun per la sanadad ed ils fatgs socials (CSS), preschentaziun dal film e discussiun "Das weisse Rauschen" (Daniel Brühl, tudestg, 2002) cun dr. Axel Baumann (clinica Waldhaus) davart ils temas schizofrenia e psichosa, (tudestg)

Infurmaziuns:
Denise Rudin, manadra da la partiziun "promoziun da la sanadad e prevenziun", tel. 081 257 64 02, e-mail denise.rudin@san.gr.ch  


Gremi: uffizi da sanadad dal Grischun
Funtauna: rg uffizi da sanadad dal Grischun
Neuer Artikel