Cuntegn da la pagina

"Ma plascha": Il Grischun intensivescha ses engaschi en las medias socialas

  • Erste Mitteilung
  • Neuen Beitrag einfügen
La regenza grischuna tira ina bilantscha positiva da l'onn d'emprova cun las medias socialas. Da Facebook, Twitter e Youtube na duai betg vegnir desistì er en il futur. En il rom da lur activitads profitan la regenza e l'administraziun da quests chanals da communicaziun.

La fin da matg 2013 ha il chantun Grischun lantschà in onn d'emprova cun novas purschidas en las medias socialas. Ina commembra e dus commembers da la regenza, plirs manaders d'uffizis sco er ils servetschs da medias da la chanzlia chantunala e da la polizia chantunala dal Grischun han experimentà, en lur qualitad uffiziala, il niz da Facebook e da Twitter per la communicaziun. Sin Youtube e sut www.gr.ch èn vegnids publitgads ultra da quai films che la chanzlia chantunala ha fatg davart conclus da la regenza e davart temas interessants da l'administraziun chantunala.

Suenter in onn cun las medias socialas è la bilantscha generala positiva. La finamira d'augmentar l'interess per l'activitad dal stadi tras ina communicaziun pli vasta ha pudì vegnir cuntanschida tenor l'avis da la regenza. Las medias socialas che permettan in barat svelt, independent dal temp e dal lieu sco er direct cun las burgaisas ed ils burgais èn in gudogn per la communicaziun dal stadi. L'interacziun sin quests chanals po dentant anc vegnir rinforzada. Er ils cuntegns pon vegnir concepids anc pli fitg en ina moda ch'els correspundan a las medias socialas. Davart quai han ins pudì far emprimas experientschas durant l'onn d'emprova.

In fatg allegraivel è ch'il dumber da las utilisadras e dals utilisaders da las medias socialas, las qualas ed ils quals tschertgan il contact cun il chantun, s'augmenta permanentamain. En il fratemp han il chantun Grischun cun tscherts posts da servetsch elegids sco er la commembra ed ils commembers da la regenza ch'èn participads a l'emprova (Mario Cavigelli, Christian Rathgeb, Barbara Janom Steiner) passa 2400 fans sin Facebook sco er bundant 4300 followers sin Twitter. En relaziun cun il dumber da la populaziun èn questas valurs tuttina autas sco quellas d'auters chantuns u schizunt anc pli autas. In diever animà ha gì er la purschida da multimedia dal chantun. Dal settember 2012 fin il mars 2014 èn vegnids producids 61 films (incl. versiuns plurilinguas e trailers) ch'èn vegnids consultads sin Youtube e sin www.gr.ch totalmain passa 53 000 giadas. Quai dat ina media da circa 2800 consultaziuns per mais.

La cumparsa dal chantun vegn amplifitgada moderadamain. Fin mez avust 2014 vegn il diever activ da las medias socialas permess d'uffizi ad ulteriurs posts da servetsch ed a collavuraturas e collavuraturs dal chantun. Las burgaisas ed ils burgais cuntanschan uschia meglier e pli svelt ina part anc pli gronda da l'administraziun. Er la maschaida dals temas sin Facebook e sin Twitter duai daventar pli attractiva ed i duain vegnir messas a disposiziun anc dapli "infurmaziuns ord emprim maun". Tut ils accounts dal chantun pon vegnir consultads sut gr.ch / Social Media. Facebook, Twitter e Youtube stattan er en l'avegnir a disposiziun a quellas collavuraturas ed a quels collavuraturs da l'administraziun chantunala che n'èn betg preschents sin quests chanals en qualitad uffiziala. La communicaziun en las medias socialas vegn coordinada ed organisada vinavant tras la chanzlia chantunala. 
 

Infurmaziuns:
chancelier dr. Claudio Riesen, tel. 081 257 22 21 


Gremi: regenza
Funtauna: rg chanzlia chantunala dal Grischun
Neuer Artikel