Il departament d'educaziun, cultura e protecziun da l'ambient ha nominà dunna Petronella Däscher sco nova bibliotecaria chantunala. Sco manadra da la biblioteca chantunala vegn ella a lavurar en l'uffizi da cultura a partir dal november 2014.

Petronella Däscher succeda dr. Christine Holliger, che ha manà la biblioteca chantunala dal Grischun quatter onns e ch'è morta il mars 2014 suenter ina lunga malsogna. Petronella Däscher che ha 56 onns è bibliotecaria diplomada BBS ed ha il certificat Master of Advanced Studies FHO Information Science da la scola auta da tecnica ed economia da Cuira. Ella ha manà sis onns la biblioteca dal seminari da magisters a Cuira ed ha alura lavurà en la biblioteca chantunala dal Grischun sco responsabla per ils nonbooks e sco incumbensada chantunala da las bibliotecas. Nelly Däscher ha sviluppà ed accumpagnà differents projects a favur da las bibliotecas grischunas. L'onn 2011 è ella daventada directura da la partiziun per creschids da la biblioteca populara dal Grischun e dus onns pli tard directura da questa biblioteca. Suenter la fusiun cun la biblioteca Aspermont ha ella surpiglià la direcziun generala da la biblioteca da la citad da Cuira.


Fotografia agiuntada: Petronella Däscher, nova bibliotecaria chantunala 


Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: Martin.Jaeger@ekud.gr.ch  


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient