Ina delegaziun dal cussegl grond da la Sursilvania ha visità oz durant la sessiun da zercladur 2014 il cussegl grond dal Grischun. 

Suenter ch'ina delegaziun dal cussegl grond dal Grischun è stada l'onn passà sin visita tar il cussegl grond da la Sursilvania, ha oz pudì vegnir beneventada a Cuira ina delegaziun dal parlament da la Sursilvania. La delegaziun da nov persunas da la Sursilvania è vegnida manada dal president dal parlament chantunal Urs Küchler. El è vegnì accumpagnà tranter auter dal vicepresident dal parlament chantunal Hans-Melk Reinhard.

Ils giasts da la Sursilvania èn vegnids beneventads dal president dal cussegl grond Hans Peter Michel e dal vicepresident dal cussegl grond Duri Campell. Da vart dal Grischun èn sa participads a l'inscunter ultra da quai ils presidents da las fracziuns. L'avantmezdi ha la delegaziun suandà las tractativas actualas en l'edifizi dal cussegl grond. Il suentermezdi è stada ina visita dal museum da la natira dal Grischun sin il program.

La visita da la delegaziun ha servì al barat d'experientschas sco er a la tgira da las relaziuns amicablas. Questas scuntradas cun persunas directivas amias da parlaments chantunals han lieu pli u main regularmain ina fin duas giadas l'onn. 
 

Fotografias agiuntadas: - Hans Peter Michel, president dal cussegl grond, beneventa a Cuira Urs Küchler, president dal parlament chantunal da la Sursilvania (a dretga).

- Las duas delegaziuns parlamentaras davant l'edifizi dal cussegl grond.


Gremi: chanzlia chantunala dal Grischun
Funtauna: rg chanzlia chantunala dal Grischun