Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna beneventa la creaziun d'in fond per l'infrastructura da las vias da la confederaziun. En quest connex duain vegnir resguardads suffizientamain ils interess da las regiuns da muntogna. 

Il nov fond per l'infrastructura da las vias da la confederaziun vegn sustegnì
La regenza grischuna beneventa da princip il fond per las vias naziunalas e per il traffic d'aglomeraziun (NAF) ch'il cussegl federal vul crear per finanziar projects da vias. Sco cuntrapart strategica al conclus federal davart la finanziaziun e l'amplificaziun da l'infrastructura da viafier (FAIV) è quest fond da gronda impurtanza er per il chantun Grischun. La regenza sustegna en sia consultaziun a la confederaziun las posiziuns da la conferenza da las regenzas dals chantuns alpins (CRCA) e da la conferenza svizra dals directurs da construcziun, da planisaziun e da protecziun da l'ambient (CCPA). Tuttas duas conferenzas pretendan ch'il NAF stoppia garantir la confinanziaziun federala integrala ed illimitada dals programs d'aglomeraziun futurs sco er il mantegniment da la substanza da las vias principalas en ils territoris alpins ed en las regiuns perifericas, e quai almain en la dimensiun actuala. Er la midada da classificaziun da var 380 kilometers vias chantunalas en la rait da vias naziunalas duai vegnir integrada en la nova soluziun da finanziaziun. 
 

Da vischnancas e da regiuns  
  • Scuol: Il plan da zonas e plan general da furmaziun 1:1000 "Deponia Plansechs", che la vischnanca da Scuol ha concludì ils 24 da november 2013, vegn approvà. Uschia vegn stgaffida en la planisaziun d'utilisaziun la premissa per ina deponia da material da stgavament e da rumida nunsmerdà en il territori da Plansechs.
  • S. Martin e Val S. Pieder: La cunvegna ch'è vegnida concludida ils 11 d'avrigl 2014 da las vischnancas da S. Martin e da Val S. Pieder per fusiunar las duas vischnancas per il 1. da schaner 2015 a la nova vischnanca da Val S. Pieder vegn approvada. Questa fusiun sto anc vegnir concludida dal cussegl grond.
  • Vuorz: A la vischnanca da Vuorz vegn garantida per la 2. etappa da la renovaziun dal provediment d'aua ina contribuziun da 18 225 francs. Quai cun resalva dal subvenziunament tras la confederaziun.
 
Contribuziuns chantunalas a differentas instituziuns 
  • Fundaziun "Gott hilft": A la fundaziun "Gott hilft" vegn concedida ina contribuziun da construcziun da maximalmain 109 000 francs per construir in nov edifizi da substituziun sco susta d'autos per la scola-dimora a Scharans. La scola-dimora a Scharans è ina instituziun renconuschida da la scolaziun speziala.
 
Projects da vias
Ultra da quai ha la regenza approvà 2,119 milliuns francs per lavurs da construcziun sin ils suandants trajects:
- via taliana: lavurs d'impressari e da cuvrida, punt a spunda Nundraus
- via naziunala Partenz: lavurs d'impressari, sviament da Küblis 
 

Gremi: regenza
Funtauna: rg chanzlia chantunala dal Grischun
Neuer Artikel