Cuntegn da la pagina

Communicaziun da la regenza dals 3 da fanadur 2014

  • Erste Mitteilung
  • Neuen Beitrag einfügen
En sia ultima sesida ha la regenza tractà diversas fatschentas da vischnancas e da regiuns. 

Da vischnancas e da regiuns
  • Alvaschagn: La revisiun parziala da la planisaziun locala, concludida da la vischnanca d'Alvaschagn ils 13 da december 2013, vegn approvada cun resalva. Il project da revisiun cuntegna in regruppament da la zona da construcziun per meglierar las pussaivladads da surbajegiar la zona da mastergn ad Alvaschagn. Per construir ina tratga da salmuns duai ina surfatscha da circa 2 945 meters quadrat vegnir transferida da l'ulteriur territori communal resp. da la zona da selvicultura a la zona da mastergn.
  • Lantsch: La revisiun parziala da la planisaziun locala, concludida da la vischnanca da Lantsch ils 26 da zercladur 2013, vegn approvada cun las cundiziuns tenor l'examinaziun ecologica. La revisiun parziala cumpiglia in plan da zonas 1:1000 "Revisiun parziala (Chava da gera Bova Pintga)". Actualmain explotescha la firma Kieswerk Bovas SA material en duas etappas d'utilisaziun. En l'avegnir duai esser pussaivel d'explotar material d'ina terza etappa d'utilisaziun, perquai che las duas emprimas etappas vegnan proximamain ad esser terminadas.
  • Luzein: Per la revisiun parziala da la planisaziun locala, concludida da la vischnanca da Luzein ils 14 da mars 2014, vegnan approvads il plan da zonas e plan general da furmaziun 1:500 "Pany" sco er il plan general d'avertura 1:500 "Pany". Il motiv per la revisiun parziala è la surbajegiada planisada en il territori "Sandegga" a Pany cun in edifizi da quatter plauns e cun in stabiliment da parcar public. Igl è previs da duvrar l'edifizi per l'administraziun, sco p.ex. per la chanzlia communala e per il biro da turissem, ma er sco spazi d'abitar per persunas attempadas.
  • Claustra-Serneus: Per il project per il svilup regiunal Claustra-Serneus renconuscha la confederaziun custs da 3 695 704 francs sco custs subvenziunabels. La tariffa da contribuziun da la confederaziun importa 40 pertschient, uschia ch'i resulta ina contribuziun federala dad 1 478 281 francs. Las contribuziuns da la confederaziun premettan ina cuntraprestaziun chantunala. La tariffa da contribuziun dal chantun è 32 pertschient. La contribuziun chantunala importa pia maximalmain 1 182 625 francs.
  • Ardez, Ftan, Guarda, Scuol, Sent e Tarasp: La cunvegna ch'è vegnida concludida ils 29 resp. 30 da mars 2014 da las vischnancas d'Ardez, Ftan, Guarda, Scuol, Sent e Tarasp per fusiunar questas vischnancas per il 1. da schaner 2015 a la nova vischnanca da Scuol vegn approvada. Davart la fusiun da vischnancas vegn il cussegl grond a decider definitivamain.
  • Lavin, Susch e Zernez: La cunvegna ch'è vegnida concludida ils 24 d'avrigl 2014 da las vischnancas da Lavin, Susch e Zernez per fusiunar questas vischnancas per il 1. da schaner 2015 a la nova vischnanca da Zernez vegn approvada. Davart la fusiun da vischnancas vegn il cussegl grond a decider definitivamain. 
     

 Projects da vias
Ultra da quai ha la regenza approvà 2,7 milliuns francs per lavurs da construcziun sin il suandant traject:
- A28, via naziunala Partenz: lavurs da cuvrida, tunnel da Küblis, en il rom da las lavurs da construcziun per il sviament da Küblis, traject access da Landquart – Claustra/Selfranga 
 
 
Gremi: regenza
Funtauna: rg chanzlia chantunala dal Grischun

Neuer Artikel