Cuntegn da la pagina

"Agenda 2030 Grischun" – project da pilot cuminaivel tranter la confederaziun ed il chantun Grischun

  • Erste Mitteilung
  • Neuen Beitrag einfügen
En il rom dal project da pilot "Agenda 2030 Grischun" elavura il chantun Grischun – en concordanza cun las regiuns – il program futur per realisar la nova politica regiunala (NPR). La NPR vul rinforzar l'economia en ils territoris rurals sco er en las regiuns da muntogna e da cunfin.

Il chantun Grischun stat davant grondas sfidas en quai che reguarda ses svilup economic a lunga vista sco er la colonisaziun duraivla da sias valladas. Tras la nova politica regiunala (NPR) porscha la confederaziun als territoris da muntogna, als spazis rurals ed a las regiuns da cunfin in agid per vegnir a fin cun las midadas da structura. La NPR vul gidar a meglierar las premissas economicas localas per activitads d'interpresa, ed ella promova innovaziuns, la creaziun da valurs e la cumpetitivitad en las regiuns en mira. Qua tras furnescha la NPR ina contribuziun a la creaziun ed al mantegniment da plazzas da lavur, ed ella gida indirectamain a mantegnair la colonisaziun decentrala en Svizra sco er a reducir disparitads regiunalas.

Tras il nov program naziunal da plirs onns fixescha la confederaziun las directivas per ils proxims 8 onns (2016–2023) cun agid d'accents e da cuntegns da promoziun. La basa per exequir la NPR en ils chantuns è in program da realisaziun chantunal da mintgamai 4 onns che cumpiglia ina cunvegna da prestaziun tranter la confederaziun ed il chantun. Fin mez da l'onn 2015 sto il chantun Grischun inoltrar al secretariat da stadi per l'economia (SECO) in nov program da realisaziun per la perioda 2016–2019. 

Il chantun Grischun ha tschernì ina metoda integrala 
Sin fundament da las experientschas fatgas fin ussa cun l'execuziun da la NPR ha il chantun Grischun tschernì ina metoda integrala cun il titel da lavur "Agenda 2030 Grischun" per realisar en l'avegnir la NPR ed il svilup economic en sias regiuns. En vista als lungs temps preparatorics da numerus projects impurtants per l'economia regiunala duai il process analitic tschernì augmentar la segirezza da planisaziun per ils projects e per las prestaziuns preliminaras necessarias da vart da las vischnancas, da las regiuns e dal chantun ed en spezial meglierar las premissas per investiziuns.

La "Agenda 2030 Grischun" vegn realisada da l'uffizi per economia e turissem (UET) sco project da pilot e sustegnida dal SECO. Sia finamira principala è quella d'elavurar – sin basa dal consens – cleras strategias da svilup per mintga regiun e da fixar lur orientaziun strategica sco er mesiras priorisadas concretas. La "Agenda 2030 Grischun" è coordinada cun il rapport davart la "Strategia generala per il svilup economic en il chantun Grischun" ch'è actualmain en elavuraziun, cun il sboz dal "Concept da spazi dal Grischun" e cun il plan directiv chantunal che sto vegnir revedì. Realisada vegn ella en stretga coordinaziun cun l'uffizi per il svilup dal territori (UST).

L'entir project è dividì en general en otg projects parzials regiunals. En mintga regiun han lieu lavuratoris cun persunas che han la responsabaladad en dumondas politicas, economicas e socialas. Il proceder vegn lantschà en il decurs da la stad en duas regiuns tschernidas (Surselva ed Engiadin'ota). Sin basa da las emprimas enconuschientschas vegn el lura realisà a partir da la fin da l'atun 2014 en tut las autras regiuns.

Manà vegn l'entir project dals dus incumbensaders, vul dir dal UET e dal SECO, ensemen cun l'incumbensada, vul dir la cuminanza da lavur "Agenda 2030". Cun vusch consultativa stat a disposiziun a la direcziun dal project "Agenda 2030 Grischun" ina gruppa directiva che sa cumpona da 15 persunalitads dal chantun. Quella reflectescha da temp en temp il process ord vista chantunala. In'emprima sesida ha gì lieu ils 25 da zercladur 2014. A chaschun da quella èn ins sa cunvegnì davart il proceder en las regiuns e davart ils pass concrets areguard la metoda ed il cuntegn. 

Ulteriuras infurmaziuns chattais Vus sin www.awt.gr.ch > Themen/Projekte > Agenda 2030. 


Infurmaziuns:
Eugen Arpagaus, manader da l'uffizi per economia e turissem, tel. 081 257 23 77, e-mail: eugen.arpagaus@awt.gr.ch  


Gremi: uffizi per economia e turissem dal Grischun
Funtauna: rg uffizi per economia e turissem dal Grischun
Neuer Artikel