Zum Seiteninhalt

Dis europeics dal monument a Mustér ils 13 da settember 2014

  • Erste Mitteilung
  • Neuen Beitrag einfügen
La 21avla ediziun dals dis europeics dal monument ha lieu en il Grischun, e quai sonda, ils 13 da settember 2014 a Mustér. La tgira da monuments, il servetsch archeologic dal Grischun sco er la protecziun da la patria dal Grischun preschentan a las visitadras ed als visitaders in program varià.

Ils dis dal monument cun il tema da quest onn "A maisa" vegnan averts uffizialmain sonda, ils 13 da settember 2014, a las 10.30 en la claustra da Mustér. Per l'avertura discurran il cussegl guvernativ Martin Jäger, schef dal departament d'educaziun, cultura e protecziun da l'ambient, l'avat Vigeli Monn, claustra da Mustér, Francestg Cajacob, president communal da Mustér, Thomas Reitmaier, archeolog chantunal, sco er Simon Berger, tgirader da monuments chantunal. Diversas visitas guidadas ed exposiziuns vegnan purschidas a partir da las 11.30 en ed enturn la claustra. Tenor la devisa dals dis dal monument da quest onn vegnan ins a savair chaussas interessantas per exempel or da cudeschs da cuschinar istorics, ulteriuras occurrenzas captivantas èn deditgadas a l'architectura nova u a la cuntrada sacrala da Mustér. Terminada vegn l'occurrenza d'ina maisa radunda che ha lieu a las 16.30 cun ina discussiun al podium davart il tema cultura architectonica: vitg ed identitad. Da la partida vegnan ad esser Gion A. Caminada, Christian Wagner, Esther Casanova, Iso Mazetta e Johannes Florin. A moderar vegn Daniel A. Walser.
Il program detaglià è publitgà en l'internet sut www.denkmalpflege.gr.ch, www.heimatschutz-gr.ch e www.hereinspaziert.ch.  

Per in vast public
Dapi lur emprima realisaziun l'onn 1994 èn ils dis europeics dal monument sa sviluppads a l'occurrenza la pli gronda en il sectur da la tgira da monuments. La finamira da questa occurrenza è quella da sensibilisar in vast public per il mantegniment da bains culturals. Las visitas vegnan organisadas en emprima lingia dals posts spezialisads federals, chantunals e municipals per la tgira da monuments e per l'archeologia. Els tschernan mintga onn ils objects, contacteschan las proprietarias ed ils proprietaris ed organiseschan las visitas guidadas e las occurrenzas al lieu.
Il center naziunal d'infurmaziun per il mantegniment dals bains culturals (NIKE) è responsabel per la coordinaziun da las var 200 occurrenzas en l'entira Svizra, per la lavur naziunala da medias e da publicitad sco er per la publicaziun dal program en furma d'ina broschura ed en l'internet. Il di europeic dal monument è ina manifestaziun culturala che vegn lantschada uffizialmain dal cussegl da l'Europa. L'iniziativa vegn er sustegnida da l'Uniun europeica. Il di dal monument ha lieu en 48 pajais europeics. 


Agiunta:
Program Dis europeics dal monument 2014 a Mustér 


Infurmaziuns:
Marlene Fasciati, tgira da monuments dal Grischun / uffizi da cultura, tel. 081 257 27 89, e-mail marlene.fasciati@dpg.gr.ch  


Gremi: uffizi da cultura
Funtauna: rg uffizi da cultura
Neuer Artikel