Ils 13 da settember 2014, suenter in temp da construcziun da 2 onns, vegn inaugurada uffizialmain a Stagias, Medel (Lucmagn) la stanza da scola en il guaud cun il num equivoc "Academia Vivian". La "Academia Vivian" duai esser in lieu per la scolaziun d'uffants, da giuvenils e da persunas creschidas davart ils temas guaud, selvaschina e natira. L'academia ha architectonicamain la furma d'in bist cupitgà – sin basa dal stemprà "Vivian" che ha devastà l'onn 1990 cunzunt la part sura da la Surselva.

A Stagias, in dies tranter il Rain anteriur ed il Rain da Medel, vegn construì il center da furmaziun "Academia Vivian". L'edifizi sa chatta sin ina surfatscha ch'è vegnida devastada l'onn 1990 per gronda part da l'orcan "Vivian". L'edifizi è construì en emprima lingia cun laina massiva indigena. Las vischnancas da Mustér, Tujetsch, Medel (Lucmagn), Sumvitg, Trun e Breil han realisà il project cuminaivlamain cun l'uffizi da guaud e privels da la natira dal Grischun. L'edifizi è vegnì concepì dal biro d'architectura Gujan + Pally, Igis/Curaglia.

L'idea da fundar ina "Academia Vivian" è naschida l'onn 2009 en il ravugl dals selviculturs da revier da las vischnancas responsablas e da l'inschigner forestal regiunal. Il project è vegnì sviluppà vinavant cuntinuadamain en collavuraziun cun las vischnancas responsablas da la regiun Sursassiala. Suenter avair fatg in'evaluaziun dal lieu ed ina concurrenza d'architectura è vegnida construida a Stagias ina stanza da scola en il guaud, sco ch'ella exista gia en differentas autras regiuns dal chantun (per exempel la Bärenhütte a Cuira, il Blockhus Bot Mulins a Panaduz e l'object il pli nov la Tegia da vaut a Domat). En la Cadi mancava fin ussa ina tala purschida. L'academia vegn a serrar questa largia. 

Construida cun laina indigena
Il concept architectonic dueva resguardar – ultra da la relaziun cun il tema "Vivian" – er spezialmain la valurisaziun regiunala. L'edifizi è construì per gronda part cun materials regiunals. Ils guauds vischins han furnì la laina per la construcziun. En la resgia communala da Medel (Lucmagn) è questa laina vegnida tagliada ed en l'interpresa vischina Tarcisi Maissen SA, Trun, è ella vegnida elavurada vinavant. Las schlondas da lain èn vegnidas producidas a maun dals emprendists forestals. La crappa per la pigna-scalegl deriva da la chava vischina a Mompé Medel. Electricitad furnescha in implant fotovoltaic. L'edifizi è isolà e po pia vegnir duvrà er durant l'enviern.

In concept d'utilisaziun detaglià vegn elavurà actualmain en collavuraziun cun l'institut per l'ambient e las resursas natiralas (IARN). La finamira è quella da metter a disposiziun – tant a las scolas indigenas sco er a quellas d'ordaifer – localitads e material d'instrucziun. Er persunas privatas, firmas ed uniuns duain pudair prender en locaziun l'academia per occurrenzas spezialas u per acziuns da voluntarias e voluntaris. L'edifizi ha plazza per circa 40 persunas. Per differentas gruppas en mira duain vegnir purschidas excursiuns e visitas guidadas. La finala duain er vegnir pussibilitadas acziuns da voluntarias e voluntaris per firmas e per uniuns. In emprim partenari han ins gia chattà cun la fundaziun per il guaud da muntogna, Trin.

La festa d'inauguraziun ha lieu sonda, ils 13 da settember 2014. La festa cumenza a las 11.00. Tranter ils giasts vegn il president communal da Medel (Lucmagn), Peter Binz, a pudair beneventar il president da la regenza dr. Mario Cavigelli sco er l'avat da la claustra da Mustér, Vigeli Monn. 
 

Fotografia agiuntada: