La cumissiun dal cussegl grond per economia e taxas ha tractà il rapport davart il svilup economic en il chantun Grischun. Ella è entrada unanimamain en la fatschenta ed ha deliberà il rapport per mauns dal cussegl grond.
La cumissiun dal cussegl grond per economia e taxas (CET) ha predeliberà en pliras sesidas – sut il presidi dal president da la cumissiun Urs Marti ed en preschientscha dal cusseglier guvernativ Hansjörg Trachsel, schef dal departament d'economia publica e fatgs socials – la missiva da la regenza "Rapport davart il svilup economic en il chantun Grischun" per mauns dal cussegl grond.
Per incumbensa dal cussegl grond ha la regenza fatg in rapport che porscha ina vista cumplessiva davart il svilup economic dal chantun Grischun. Il rapport mussa direcziuns che permettan da realisar in svilup economic interdisciplinar e progressiv. La cumissiun ha discutà intensivamain questas direcziuns ed ha prendì posiziun. Cuntrari a projects da lescha, nua ch'ina cumissiun predeliberanta po proponer midadas concretas, po il cussegl grond mo far decleraziuns tar rapports da la regenza. En quest senn propona la cumissiun al cussegl grond da far decleraziuns tar intgins puncts dal rapport.
En la cumissiun è stada contestada la promoziun da manaschis singuls. Ina maioritad da la cumissiun sustegna qua la proposta da la regenza da desister, en il rom da la revisiun totala da la lescha per promover il svilup economic, en il futur d'ina promoziun da manaschis singuls. Percunter duai il Grischun esser vinavant cumpetitiv en la concurrenza fiscala cun ils chantuns da la Svizra orientala e cun il Tessin, e facilitaziuns fiscalas duai dar er vinavant sco instrument da la promoziun da manaschis singuls.
La cumissiun sustegna er cleramain la proposta da la regenza ch'il chantun dastga acquistar terren en lieus strategicamain impurtants; terren ch'el po puspè metter sin fiera, sch'i fa da basegn.
Sut il titel sanadad propona la cumissiun alura in ulteriur aspect: Il turissem da sanadad duai vegnir promovì en cooperaziun cun ils furniturs da prestaziuns turisticas.
Per pudair dar impuls a l'economia dal Grischun approvescha la cumissiun l'idea da la regenza da proponer, en il rom da la revisiun totala da la lescha per promover il svilup economic, in credit d'impegn da passa 80 milliuns francs. Quests meds finanzials duain lura star a disposiziun durant ina perioda dad 8 onns per investiziuns da terzas persunas, sch'ellas èn orientadas tenor masterplans, sch'ellas creeschan valur suror il project sustegnì e sch'ellas stgaffeschan plazzas da lavur en il chantun.
Il cussegl grond vegn a tractar il rapport davart il svilup economic en il chantun Grischun en la sessiun da december 2014.
Agiunta:
Protocol da las sesidas da la cumissiun per economia e taxas: rapport davart il svilup economic en il chantun Grischun
Infurmaziuns:
president da la cumissiun Urs Marti, tel. 081 254 41 00
Gremi: cumissiun per economia e taxas
Funtauna: rg cumissiun per economia e taxas