Cuntegn da la pagina

Patrimoni cultural audiovisual dal Grischun

  • Erste Mitteilung
  • Neuen Beitrag einfügen
Rimnar, cataloghisar ed intermediar medias audiovisualas che stattan en relaziun cun il Grischun. Da questa tematica s'occupa in project da la biblioteca chantunala dal Grischun en collavuraziun cun l'uffizi da cultura. En il rom dal colloqui da quest onn da l'uniun Memoriav vegn preschentada ina schelta da projects e d'iniziativas sut il titel "Il patrimoni audiovisual e la rolla dals chantuns". A chaschun da la dieta speziala che ha lieu a Cuira surpiglia il Grischun ina posiziun particulara.

Il project che vegn realisà da la biblioteca chantunala ha la finamira da far in catalog online cun ils documents da film, da video e da tun d'impurtanza istorica che han ina relaziun cun il Grischun e che n'eran enfin ussa betg cataloghisads. Pervia da la periclitaziun acuta da questas archivalias – per exempel cassettas VHS, bindels magnetics sco er films da 16 mm ed 8 mm – èsi inditgà da prender mesiras d'urgenza, perquai ch'ellas sa laschan conservar mo limitadamain. Las datas da quests bains culturals audiovisuals duain vegnir rendidas accessiblas ad ina publicitad interessada a partir da la fin da l'onn 2015 sur in portal en l'internet. Igl è previs che la biblioteca chantunala survegn ina copia digitala da quest medium ch'ella po metter a disposiziun a sia clientella registrada a staziuns da multimedia per guardar e per tadlar.

L'uniun Memoriav s'engascha per la conservaziun dal patrimoni cultural audiovisual da la Svizra. Ella vegn finanziada per la gronda part da la confederaziun e gida dapi sia fundaziun l'onn 1995 en blers chantuns ed en bleras regiuns da la Svizra tar la lavur da conservaziun, iniziond e sustegnend projects. Oz s'engaschan pli e pli er ils chantuns per conservar lur patrimoni cultural audiovisual. L'iniziativa dal chantun Grischun è in bun exempel en chaussa. Er per quest motiv organisescha Memoriav ses colloqui, ch'è adressà a persunas spezialisadas e che tracta il tema "Il patrimoni audiovisual e la rolla dals chantuns", quest onn en il chantun Grischun. Cun il colloqui 2014 da Memoriav duai vegnir preschentada ina schelta da projects e d'iniziativas da differents chantuns. L'emprim di, ils 27 da november, stat il chantun Grischun cun ses project en il center da las preschentaziuns e da las discussiuns.
Ulteriuras infurmaziuns en tudestg chattan ins sin: www.memoriav.ch


Fotografias agiuntadas:
-
Il manader da project Pascal Werner a chaschun da la controlla da la perfuraziun e da las parts tatgadas d'in film da 16 mm en il magasin da la biblioteca chantunala.

-
Stgatlas da films ch'èn gia vegnids digitalisads en il magasin da la biblioteca chantunala
 

Infurmaziuns:
Andri Janett, biblioteca chantunala dal Grischun, tel. 081 257 28 22, e-mail andri.janett@kbg.gr.ch  
 

Gremi: biblioteca chantunala dal Grischun
Funtauna: rg biblioteca chantunala dal Grischun
Neuer Artikel