Zum Seiteninhalt

"Isolar gida a stgaudar" – concretisaziun da la vieuta energetica

  • Erste Mitteilung
  • Neuen Beitrag einfügen
Tras ina nova roadshow renda l'uffizi chantunal d'energia e da traffic visibel e palpabel in sectur impurtant da la vieuta energetica. Ils 8 da december 2014 ha lieu la partenza a Cuira. Duas pitschnas chasas da model, che vegnan mintgamai stgaudadas cun ina chandaila, demonstreschan l'effect da l'isolaziun termica sco er las differenzas da confort tranter ina chasa veglia mal isolada ed ina sanaziun energetica exemplarica.

La strategia d'energia 2050 da la confederaziun e dals chantuns cumpiglia principalmain trais secturs: la sortida da l'energia nucleara, la promoziun d'energias regenerablas e l'effizienza da l'energia. L'effizienza da l'energia da sia vart cuntegna cunzunt la sanaziun termica d'edifizis existents. Il project "Isolar gida a stgaudar" duai promover quest sectur parzial da la vieuta energetica sco er auzar la quota da sanaziuns d'edifizis existents. Chasas bain isoladas han blers avantatgs: damain custs d'energia, dapli confort, meglras pussaivladads da dar en locaziun la chasa, e la valur da la chasa tegna pli ditg. Plinavant vegnan schanegiadas las resursas, ed il clima vegn protegì en moda duraivla. 

Partenza a Cuira – finiziun a Tavau
Durant la roadshow da l'uffizi d'energia e da traffic mussan las duas differentas chasas da model – che vegnan stgaudadas tuttas duas cun ina chandaila – che la chasa veglia cuntanscha mo ina temperatura modesta, entant che la chasa sanada ha ina temperatura interna agreabla, malgrà ch'igl è enviern. Glindesdi, ils 8 da december 2014, a las 18.15, cumenza il project sin la plazza dal teater a Cuira. La finiziun ha lieu ils 12 da favrer 2015 a Tavau sut il patrunadi dal president communal Tarzisius Caviezel. Tut las staziuns han il label "citad d'energia". La roadshow è ils 5 da schaner 2015 a Glion, ils 14 da schaner 2015 a Landquart ed ils 29 da schaner 2015 a San Murezzan. Las duas chasettas restan mintgamai durant in'emna en quests lieus. L'ultim di ha er lieu ina saira d'infurmaziun, nua ch'i vegnan explitgads tranter auter ils programs da promoziun existents ed il proceder per sanar in edifizi. 

Programs da promoziun remunereschan iniziativas privatas
Il chantun Grischun dispona d'ina vasta paletta per promover edifizis existents. Ils programs da promoziun remunereschan proprietarias e proprietaris innovativs che renoveschan lur immobiglias. Il program d'edifizis naziunal sustegna finanzialmain parts dals mirs exteriurs dals edifizis. Il chantun Grischun promova sanaziuns cumplettas sin basa da las pretensiuns dal program d'edifizis naziunal. Plinavant vegnan promovids indrizs da la tecnica da chasa en edifizis existents (implants solars, stgaudaments da laina, indrizs da pumpa a chalur) per trair a niz las energias regenerablas. A partir dal schaner 2015 promova il chantun Grischun supplementarmain sanaziuns da Minergie en il rom d'ina acziun da promoziun d'ina durada limitada.

Infurmaziuns detagliadas davart ils programs da promoziun èn disponiblas sin las suandantas paginas d'internet:
www.dasgebaeudeprogramm.ch (program d'edifizis naziunal)
www.aev.gr.ch/ee/beitraege (chantun Grischun)

"Isolar gida a stgaudar" – las staziuns
Cuira plazza dal teater 8 fin 15 da december 2014
Glion plazza cumin 5 fin 12 da schaner 2015
Landquart Roter Platz 14 fin 22 da schaner 2015
San Murezzan plazza communala 29 da schaner fin 5 da favrer 2015
Tavau Bubenbrunnenplatz 12 fin 19 da favrer 2015
 

Remartga per las medias:
L'occurrenza da partenza ha lieu glindesdi, ils 8 da december 2014, a las 18.15, sin la plazza dal teater a Cuira.


Fotografias agiuntadas:
-
"Isolar gida a stgaudar": Las chasas da model vegnan producidas. 

-
"Isolar gida a stgaudar": Las chasas da model finidas.


Infurmaziuns:
Barthli Schrofer, uffizi d'energia e da traffic, tel. 081 257 36 97, e-mail barthli.schrofer@aev.gr.ch  


Gremi: uffizi d'energia e da traffic dal Grischun
Funtauna: rg uffizi d'energia e da traffic dal Grischun
Neuer Artikel