Cuntegn da la pagina

Communicaziun da la regenza dals 29 da december 2014

  • Erste Mitteilung
  • Neuen Beitrag einfügen
La regenza grischuna relascha la basa per elavurar istoricamain las anteriuras mesiras repressivas per motivs da provediment en il chantun Grischun. I duai vegnir stgaffì dapli clerezza davart ina pratica da las autoritads che ha signifitgà fin l'onn 1981 savens ina gronda miseria per las persunas pertutgadas. 

Las mesiras repressivas per motivs da provediment vegnan elavuradas istoricamain
Il chantun Grischun publitgescha ina incarica da perscrutaziun per l'elavuraziun istorica da la basa en connex cun las mesiras repressivas per motivs da provediment che han existì fin l'onn 1981. La regenza ha approvà la publicaziun da l'incarica da perscrutaziun en il favrer 2015. Il studi duai permetter da far ina valitaziun fundada da las mesiras che las autoritads han prendì avant l'introducziun d'ina regulaziun da dretg civil "privaziun da la libertad per motivs da provediment" l'onn 1981. L'elavuraziun da la basa gida er ad elavurar ed a respunder en moda pli cumpetenta las dumondas da las persunas pertutgadas. Istoricras interessadas ed istorichers interessads han la pussaivladad da candidar. Per l'elavuraziun da la basa e per rediger in rapport vegni quintà cun ina lavur d'in onn per ina collavuratura academica u per in collavuratur academic. L'elavuraziun dal studi vegn accumpagnada d'ina gruppa da project che stat sut il presidi da l'archivari dal stadi Reto Weiss. 

Nagina sanaziun da l'aua restanta da las ovras electricas da La Punt/Rehenau
D'ina sanaziun da l'aua restanta da las ovras electricas da La Punt vegni desistì. Las ovras electricas da La Punt SA (OELP) vegnan relaschadas da l'obligaziun da sanar correspundenta. Il stabiliment existent cumpiglia sco retratga d'aua la serra d'accumulaziun a La Punt. Sin fundament da la reglamentaziun da la dotaziun e sin fundament da la stgala da peschs al Rain che funcziunescha n'exista betg in basegn d'agir per las OELP tenor la lescha federala davart la protecziun da las auas. Tenor la lescha ston mesiras da sanaziun vegnir ordinadas, sche l'ecologia d'auas currentas vegn influenzada essenzialmain tras retratgas d'aua. Il traject d'aua restanta a La Punt è dentant natiral. 


Contribuziuns chantunalas a differentas instituziuns
  • Fundaziun Special Olympics Switzerland: A la fundaziun Special Olympics Switzerland vegn empermess – cun la premissa che la citad/las vischnancas (Cuira, Churwalden, vischnanca burgaisa da Cuira) e l'organisaziun turistica (Cuira turissem) pajan er contribuziuns – a favur da la National Winter Games Cuira 2016 ina contribuziun totala da 100 000 francs. La fundaziun organisescha dals 3 fin ils 6 da mars 2016 la National Winter Games a Cuira. Als gieus per persunas cun in impediment spiertal vegnan spetgadas circa 600 atletas ed atlets, 200 assistentas ed assistents sco er passa 500 gidantras e gidanters da l'entira Svizra. Las cumpetiziuns han lieu si Brambrüesch en las disciplinas skis alpin, passlung ed ir cun l'aissa sco er en las hallas da gimnastica da la scola professiunala Cuira en la disciplina unihockey. Sche l'occurrenza na vegn betg organisada u vegn realisada mo per part pervia da circumstanzas externas (p.ex. mancanza da naiv), po la contribuziun vegnir scursanida.
  • Graduate school dal Grischun: A la graduate school dal Grischun vegn empermessa per il project "forschung live! – en il Grischun" durant l'onn 2015 ina contribuziun unica da 30 000 francs. La campagna naziunala "forschung live!" a chaschun dal giubileum da 200 onns da l'academia svizra da las scienzas natiralas dat a las scolas autas ed als instituts da perscrutaziun dal chantun Grischun l'onn 2015 la pussaivladad d'experimentar la scienza e da render pli enconuschents ad ina vasta publicitad ils temas multifars da la perscrutaziun e da l'instrucziun. Passa 20 instituziuns èn s'unidas en quest project. Lantschada vegn questa seria d'occurrenzas che dura plirs mais ils 17 da zercladur 2015 a Tavau.
  • Fundaziun Pro claustra Son Jon a Müstair: Per la restauraziun, etappa 2014, da la claustra Son Jon a Müstair vegn garantida ina contribuziun chantunala da maximalmain 109 100 francs, e quai en il rom da la protecziun da monuments. 
     

 Projects da vias
- Via da Fläsch: Il project d'exposiziun per la correcziun da la via da Fläsch, bifurcaziun Bofelweg – punt dal Rain, vegn approvà cun cundiziuns. Sin quest traject da la via chantunala da colliaziun èn las cuvridas en in nausch stadi, ultra da quai èn insuffizients la ladezza da la via e l'allontanament da l'aua da surfatscha.
- Basa da l'uffizi da construcziun bassa a Küblis: Il project d'exposiziun per ina nova basa per il mantegniment da las vias da l'uffizi da construcziun bassa a Küblis sin il territori communal da Luzein vegn approvà. Il mantegniment da la via dal Partenz central vegn garantì actualmain davent da la basa a Fideris. Questa basa na cuntenta betg pli las pretensiuns dad oz. La nova basa per il mantegniment da las vias a Küblis cuntegna ina halla da deposit, in stabiliment al liber cun il material per il servetsch d'enviern e cun pussaivladads per plazzar ils vehichels che servan a rumir la naiv.

Ultra da quai ha la regenza approvà 3,464 milliuns francs per lavurs da construcziun sin ils suandants trajects:
- via d'Engiadina: lavurs d'impressari, correcziun da la via, Lavin – Giarsun
- via da Sent: lavurs d'impressari, correcziun da la via, Sent – Crusch 
 

Per la fin da l'onn
Durant l'onn che va a fin ha la regenza grischuna salvà 43 sesidas. Ella ha prendì 1244 conclus (onn precedent: 1281).
Il presidi da la regenza passa il 1. da schaner 2015 a Martin Jäger, schef dal departament d'educaziun, cultura e protecziun da l'ambient. Vicepresident daventa Christian Rathgeb, schef dal departament da giustia, segirezza e sanadad.
La regenza giavischa a tut las conburgaisas ed a tut ils conburgais tut il bun per la fin da l'onn e buna sanadad per l'onn nov. 
 

Gremi: regenza
Funtauna: rg chanzlia chantunala dal Grischun

Neuer Artikel