Zum Seiteninhalt

Procurar a temp novs documents d'identitad

  • Erste Mitteilung
  • Neuen Beitrag einfügen
Il temp da vacanzas è il temp da viagiar. Tar la preparaziun tutgi er da controllar ch'ils documents d'identitad sajan anc valaivels. Tut tenor la destinaziun da vacanzas dovran er uffants pitschens in'atgna carta d'identitad u in agen passaport. In nov film da la chanzlia chantunala dal Grischun mussa sut www.gr.ch, co ch'in nov passaport u ina nova carta d'identitad vegn fatga, quant che quai custa e tge ch'ins sto far, sch'ins perda il document d'identitad.

Dapi il mars 2010 vegnan emess mo pli passaports biometrics. Quai vul dir che tut tgi che dovra in nov document d'identitad sto sa preschentar persunalmain en in center da documents d'identitad dal chantun. Là vegn fatga ina fotografia e vegnan prendidas las improntas dals dets. Per quest intent sto vegnir fixà in termin. Quai pon ins far per telefon u online (www.schweizerpass.ch). En il chantun Grischun pon ins tscherner tranter il center da documents a Cuira ed il center da documents regiunal a Zernez. Las abitantas ed ils abitants dal district da la Moesa pon er laschar registrar lur datas a Bellinzona. Il pli tard 10 dis da lavur suenter ch'ins è stà tar il center da documents vegnan ils novs documents d'identitad tramess per posta. Tgi che dovra mo ina carta d'identitad, ha er vinavant la pussaivladad da sa preschentar persunalmain tar la vischnanca da domicil. Prender cun sai ston ins il vegl document e per regla ina fotografia da passaport actuala da buna qualitad en il format da 35 mm x 45 mm. Pussaivel è quai dentant mo tar vischnancas ch'èn prontas d'acceptar dumondas per cartas d'identitad. 
 
Remartga:
Il video davart quest tema stat a disposiziun sut www.gr.ch
 

Infurmaziuns:
- Ursula Tobler, manadra dal ressort "centers da documents d'identitad", uffizi da migraziun e da dretg civil, tel. 081 257 52 21, e-mail: ursula.tobler@afm.gr.ch  
 

Gremi: uffizi da migraziun e da dretg civil dal Grischun
Funtauna: rg uffizi da migraziun e da dretg civil dal Grischun
Neuer Artikel