Cuntegn da la pagina

Communicaziun da la regenza dals 29 da schaner 2015

  • Erste Mitteilung
  • Neuen Beitrag einfügen
A sia ultima sesida ha la regenza grischuna prendì posiziun davart la refurma da l'imposiziun da taglia sin interpresas III. Ultra da quai ha ella approvà il program d'aglomeraziun da Cuira da la segunda generaziun. 
 
La regenza beneventa la direcziun generala da la refurma da l'imposiziun da taglia sin interpresas III 
La regenza grischuna è da l'avis che la refurma da l'imposiziun da taglia sin interpresas III (RTI III), planisada per l'onn 2019, è necessaria. Da ses success dependa l'attractivitad da la Svizra sco lieu economic. Ils status fiscals chantunals spezials da fin ussa per societads da holding, da domicil e maschadadas ston vegnir abolids, perquai ch'els na vegnan betg pli acceptads sin plaun internaziunal. Quai menziunescha la regenza en concordanza cun la conferenza da las regenzas chantunalas (CdC) sco er cun la conferenza da las directuras e dals directurs chantunals da finanzas (CDF) en la consultaziun a la confederaziun.
La regenza grischuna beneventa mesiras sco l'introducziun d'ina trucla da licenzas, las adattaziuns tar la taglia sin il chapital e la regulaziun transitorica per scuvrir reservas zuppadas. L'introducziun d'ina taglia sin il gudogn da chapital tras vaglias refusa la regenza percunter.
Ils chantuns vegnan pertutgads fitg differentamain da la refurma. Il Grischun è pertutgà en in emprim pass cunzunt indirectamain da la refurma, perquai che la RTI III ha consequenzas per la gulivaziun da finanzas da la confederaziun e per la concurrenza fiscala interchantunala. Ord vista da la regenza grischuna èsi fitg impurtant che las mesiras planisadas per mitigiar questas consequenzas indirectas vegnian francadas da bel principi en la lescha.

Fegliet infurmativ davart la refurma da l'imposiziun da taglia sin interpresas III  
Glossari tar la refurma da l'imposiziun da taglia sin interpresas III 
Communicaziun a las medias da la CdC 
Communicaziun a las medias da la CDF

Program d'aglomeraziun da Cuira da la segunda generaziun 
La regenza grischuna approvescha la cunvegna da prestaziun tar il program d'aglomeraziun da Cuira da la segunda generaziun tranter la citad da Cuira, il chantun e la confederaziun. La finamira dal program d'aglomeraziun da Cuira è quella da coordinar il svilup da l'abitadi e dal traffic. Il chantun Grischun sa participescha cun circa 8 milliuns francs vi da la realisaziun dal program d'aglomeraziun da Cuira da la segunda generaziun. D'ina vart vegnan sustegnidas mesiras per optimar il traffic public e per accelerar il traffic da bus. In'autra part vegn duvrada per in pachet da mesiras a favur dal traffic betg motorisà. Ils programs d'aglomeraziun vegnan
examinads mintga quatter onns da la regenza e sustegnids finanzialmain. Ils emprims meds finanzials federals per ils uschenumnads programs d'aglomeraziun da l'emprima generaziun èn vegnids deliberads l'onn 2010. Per deliberar ina segunda giada meds finanzials federals èn ils programs d'aglomeraziun vegnids elavurads danovamain ed examinads da vart da la confederaziun.

Ulteriuras infurmaziuns: uffizi per il svilup dal territori
 
Las tavlas da signalisaziun turisticas daventan pli unifurmas 
La regenza grischuna approvescha il concept per la signalisaziun turistica en il Grischun (concept da signalisaziun 2014). Las tavlas da signalisaziun turisticas a vias publicas da tut il Grischun vegnan unifurmadas. Reglads vegnan tranter auter la furma, il cuntegn ed il lieu da las tavlas. Tavlas novas vegnan mo pli permessas a norma da las directivas dal concept da signalisaziun nov. Tavlas ch'existan gia dastgan restar, sch'ellas na stattan betg ad autostradas ed autovias. Cun il concept nov s'adatta il chantun a las directivas da l'uffizi federal da vias.
 
-  -
Exempels da tavlas tenor il concept da signalisaziun 2014: Tavla da bainvegni en il Grischun (a sanestra), tavla d'avis (a dretga)


Gremi: regenza
Funtauna: rg chanzlia chantunala dal Grischun
Neuer Artikel