Navigation

Inhaltsbereich

  • Erste Mitteilung
  • Neuen Beitrag einfügen
In bun magiel vin premetta ch'i vegnia lavurà conscienziusamain en la vigna l'entir onn. Durant mintga stagiun ha il viticultur da far lavurs en las vignas ed en il tschaler da vin. En ina seria da films documentescha la chanzlia chantunala dal Grischun la viticultura al Plantahof a Landquart durant l'onn 2015.

Actualmain èn las vits en il sien d'enviern. Betg dentant las viticulturas ed ils viticulturs. Tranter il december ed il favrer taglian las viticulturas ed ils viticulturs las vits, e cun questa lavur cumenza il nov onn viticultural. Ils scherms da la vit vegnan tagliads per mantegnair la structura da la vit, ma er per far in'emprima regulaziun da la creschientscha e da la racolta, quai che ha la finala ina influenza positiva sin la qualitad da las ivas. Questa lavur premetta bleras enconuschientschas spezialisadas ed in bun sensori.
Per bleras viticulturas e viticulturs è il tagliar las vits ina da las pli bellas lavurs al liber, pertge che nagina vit è tuttina sco l'autra; per mintga vit dovri in agen tagl. Igl è perquai in'activitad fitg creativa. Decisiv è il dumber da brumbels u bots per vit, dals quals ils novs scherms chatschan la primavaira. Mintga frastga da vit ha per regla duas troclas ivas. Uschia po il viticultur calcular gia l'enviern sia racolta teoretica per il proxim atun, premess che l'aura saja favuraivla. Suenter che las vits èn tagliadas, vegn manizzada la laina tagliada. Quella smarschescha lura e daventa humus. Dal schaner fin il mars vegni plinavant mess en urden l'infrastructura da las vignas (pals, filfier) sco er tgirads e controllads apparats e maschinas. 
 

Infurmaziuns:
- Hans Jüstrich, post spezialisà per pumicultura e viticultura al Plantahof, tel. 081 257 60 60, e-mail: Hans.Juestrich@plantahof.gr.ch


Gremi: Plantahof
Funtauna: rg Plantahof
Neuer Artikel