Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna ha concedì contribuziuns finanzialas per Grischun vacanzas sco er per la meglieraziun generala da Schnaus. Plinavant ha ella approvà las revisiuns parzialas da las planisaziuns localas d'Andeer e d'Urmagn. 

La regenza grischuna ha concedì ina contribuziun chantunala extraordinaria per Grischun vacanzas
A l'uniun Grischun vacanzas vegn garantida per ils onns 2015/2016 ina contribuziun chantunala extraordinaria da 500 000 francs per elavurar ils martgads s'orientond a la purschida. Quai sut la cundiziun ch'ils partenaris en las destinaziuns concedian almain tuttina blers daners. Ils meds finanzials supplementars duain vegnir applitgads per elavurar ils martgads en Svizra s'orientond a la purschida. La percepziun dal Grischun sco regiun da vacanzas nr. 1 duai vegnir rinforzada tras ina clera communicaziun che cumpiglia pliras destinaziuns. La finamira è quella da tegnair il nivel da pernottaziuns da giasts svizzers a curta vista e d'augmentar quel a vista mesauna. Resalvada resta l'approvaziun dal credit necessari tras il cussegl grond respectivamain tras la cumissiun da gestiun. 

Sustegn finanzial per la meglieraziun generala da Schnaus
Per las lavurs da la meglieraziun generala da Schnaus vegn concedida ina contribuziun chantunala da circa 1,17 milliuns francs. Questa contribuziun dal chantun premetta ina cuntraprestaziun da la confederaziun. Quella sustegna il project cun passa 1,27 milliuns francs.
Il december 2011 ha l'anteriura vischnanca da Schnaus, ch'è oz ina fracziun da la vischnanca da Glion, concludì da far ina meglieraziun generala. Il territori dal project cumpiglia var 100 hectaras. La meglieraziun ha tranter auter la finamira da construir access segirs als manaschis purils ed al terren cultivà, d'arrundar il terren e da garantir l'utilisaziun e la cultivaziun correcta tras l'agricultura. Per la realisaziun vegni fatg quint cun circa 7 onns. 

La revisiun parziala da la planisaziun locala d'Andeer vegn approvada
La regenza grischuna ha approvà la revisiun parziala da la planisaziun locala da la vischnanca d'Andeer dals 12 da settember 2014.
En il rom da las lavurs da construcziun per las novas galarias da segirezza tar ils tunnels da Balamburtg, Crapteig, Rofla e Viamala per lung da la A13 resulta material da stgavament, d'exchavaziun e da rumida smerdà. Il material duai vegnir deponì al sid da Balamburtg, ina fracziun d'Andeer, en il territori da deponias da material Palé.
La regenza grischuna ha approvà la revisiun parziala da la lescha da construcziun sco er il plan general d'avertura 1:2000 "Revisiun parziala (deponia da rumida Palé)". Cun ina cundiziun vegnan approvads il plan da zonas 1:2000 "Revisiun parziala (deponia da rumida Palé)", il plan general da furmaziun, situaziun, 1:2000 "Revisiun parziala (deponia da rumida Palé)" ed il plan general da furmaziun, tagls, 1:1000 "Revisiun parziala (deponia da rumida Palé)". 

La regenza ha approvà la revisiun parziala da la planisaziun locala da la vischnanca d'Urmagn
La revisiun parziala da la planisaziun locala, concludida da la vischnanca d'Urmagn ils 7 d'october 2014, vegn approvada. Sco singuls meds da planisaziun ha la regenza approvà la revisiun parziala da la lescha da construcziun sco er il plan da zonas e plan general da furmaziun 1:1000 "Revisiun parziala (Aclas Mantogna)". Tras la revisiun parziala da la planisaziun locala vegn midada ina zona en la fracziun Urmagn Sura. En il sectur da la nova zona da chasas da vacanzas "Aclas Mantogna" duai vegnir construì in abitadi cun totalmain set abitaziuns da vacanzas explotadas. Quest abitadi vala sco engrondiment dal ressort da vacanzas "Aclas Beverin" cun 21 chasas da vacanzas che vegn manà dapi l'onn 2008. 

Projects da votaziun dals 14 da zercladur 2015
La regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia dals 14 da zercladur 2015:
- conclus federal davart la midada da l'artitgel constituziunal concernent la medischina da reproducziun e la tecnologia da gens sin il sectur uman
- iniziativa dal pievel "Iniziativa davart ils stipendis"
- iniziativa dal pievel "Far pajar taglias sin iertas da milliuns per finanziar nossa AVS (refurma da la taglia sin l'ierta)"
- midada da la lescha federala davart radio e televisiun
Il medem di vegni er votà davart il suandant project chantunal:
- revisiun parziala da la constituziun chantunala, nov art. 83a (realisaziun da l'iniziativa chantunala dal pievel "Gea ad electricitad netta senza forza electrica da charvun" ch'è vegnida acceptada ils 22 da settember 2013) 
 

Gremi: regenza
Funtauna: rg chanzlia chantunala dal Grischun
Neuer Artikel