Navigaziun principala

Cuntegn da la pagina

Center chantunal per l'emprima registraziun a Meiersboden

  • Erste Mitteilung
  • Neuen Beitrag einfügen
La regenza suttametta al cussegl grond la missiva per construir in nov center per l'emprima registraziun sin il territori da Meiersboden en la vischnanca da Churwalden. El duai remplazzar il center d'asil che vegn manà en immobiglias privatas a la Schönbühlstrasse a Cuira. Ils contracts da locaziun da quellas scadan il pli tard l'onn 2017. Il nov edifizi che vegn construì cun elements da lain prefabritgads vegn a porscher plazza per 180 persunas. Ils custs da construcziun per il center en proprietad dal chantun importan totalmain 7,7 milliuns francs. 

Dapi ils onns 1970 ha il chantun Grischun l'incumbensa da dar alloschi a requirentas ed a requirents d'asil durant lur procedura d'asil sco er a persunas ch'èn admessas provisoricamain durant ch'il chantun ha la cumpetenza da sustegn. Entant che numerus auters chantuns han surdà questa incumbensa per part u dal tuttafatg a las vischnancas u a persunas privatas, ademplescha il chantun Grischun sez questa incumbensa. Las persunas assegnadas al chantun vegnan collocadas tenor in concept da collocaziun e d'assistenza. Quel prevesa ina relaziun equilibrada d'atgnas immobiglias e d'immobiglias prendidas en locaziun. 

La regenza ha l'intenziun da construir a Meiersboden in nov alloschi per requirentas e requirents d'asil sper il center d'instrucziun existent per la protecziun civila. Planisà è in center per l'emprima registraziun che duai remplazzar il center per l'emprima registraziun Foral a Cuira. Quel sa cumpona da dus edifizis prendids en locaziun. In lieu substitutiv è urgent en vista al fatg ch'ils contracts da locaziun scadan il pli tard il settember 2017.

Il project da l'interpresa da construcziun Implenia SA e dal biro d'architectura Liesch Ott da Cuira che ha gudagnà la concurrenza per prestaziuns globalas ademplescha dal tuttafatg las pretensiuns qualitativas e funcziunalas da manaschi che vegnan fatgas oz ad in center d'asil. Malgrà in standard simpel vegn il nov edifizi planisà sco construcziun cun elements da lain prefabritgads ad avair in caracter plaschaivel e confortabel ch'è adattà als basegns da las utilisadras e dals utilisaders. La moda da construcziun spaziala e structurala porscha ina gronda flexibilitad areguard la midada d'utilisaziun ed areguard la reutilisabladad, quai che permetta custs da gestiun bass. Las prescripziuns dal standard da Minergie®-Eco vegnan medemamain ademplidas cun il nov edifizi.

Ils custs d'investiziun per il nov edifizi importan 7,7 milliuns francs e pon probablamain vegnir finanziads cumplainamain tras contribuziuns federalas accumuladas or dal quint d'asil. Cun las lavurs da construcziun duessi vegnir cumenzà la stad 2016, l'avertura è previsa per il zercladur 2017.

In center chantunal per l'emprima registraziun en la dimensiun planisada è necessari, quai er suenter la realisaziun da la nova structuraziun dals fatgs d'asil cun la creaziun d'alloschis federals. Sch'i vegn mess a disposiziun avunda alloschis chantunals per requirentas e requirents d'asil, restan las vischnancas il medem mument vinavant distgargiadas da questa incumbensa d'execuziun.

Il cussegl grond vegn a tractar questa fatschenta en la sessiun da zercladur 2015. 
 

Infurmaziuns:
cusseglier guvernativ dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01, e-mail Mario.Cavigelli@bvfd.gr.ch   
 

Gremi: regenza
Funtauna: rg chanzlia chantunala dal Grischun
Neuer Artikel