Cuntegn da la pagina

Program da turissem dal Grischun 2014–2021: Lantschà emprims projects

  • Erste Mitteilung
  • Neuen Beitrag einfügen
Il cussegl turistic dal Grischun ha tractà ils ultims mais differents projects concrets. El ha proponì a la regenza da promover in emprim project concernent la commerzialisaziun da velos da muntogna. Per il project "Flow Country Grischun" ha la regenza ussa garantì ina contribuziun da promoziun.

Ideas da projects innovativs duain gidar il turissem grischun da survegnir dapli perseveranza ed in retgav pli grond. La finamira dal program d'innovaziun e da cooperaziun è quella da porscher in'aventura unica al giast. Differents accents d'acziun e diversas ideas da projects dal program ch'è vegnì preschentà l'ultim onn vegnan concretisads ussa. Novas ideas per projects pon er anc ussa vegnir inoltradas d'interpresas e d'organisaziuns interessadas. 

Project "Flow Country Grischun"
Il Grischun è actualmain ina da las destinaziuns per velos da muntogna las pli enconuschentas da las Alps. Questa posiziun duai vegnir rinforzada ed extendida cun il project "Flow Country Grischun". "Flow Country Grischun" è ina rait da purschidas per il turissem da velos da muntogna en il Grischun e sa basa sin il success dal project grischunBIKE. Il center furma la pagina d'internet specifica per la gruppa en mira ed in'applicaziun mobila. Qua s'infurmeschan las ciclistas ed ils ciclists davart turas, davart purschidras e purschiders, davart occurrenzas e davart purschidas. Tut las purschidas pon vegnir cudeschadas directamain online. Las furnituras ed ils furniturs da prestaziuns per il turissem da velo da muntogna (hotels, telefericas, purschidras e purschiders da turas) vegnan colliads in cun l'auter per promover uschia la valurisaziun turistica en general. En ses giudicament è il cussegl turistic vegnì a la conclusiun ch'il project s'adattia perfetgamain cun la via d'innovaziun instradada. El persequitescha ina finamira economica, è consequent ord vista da la clientella e gida ad augmentar la valurisaziun ed a meglierar la posiziun en la concurrenza. Sin dumonda dal cussegl turistic ha la regenza deliberà per quest project ina contribuziun da promoziun da totalmain 430 000 francs per ils proxims 4 onns.

Project "Fascinaziun turissem"
In'opiniun positiva da la populaziun davart il turissem e davart sia impurtanza è in factur essenzial per in'economia da turissem prosperaivla. Ultra da furnituras e da furniturs da prestaziuns turisticas sco per exempel hotels, telefericas, restaurants u er organisaturas ed organisaturs d'events influenzescha er la populaziun indigena decisivamain la reputaziun da las destinaziuns da vacanzas. La populaziun duai survegnir in liom emoziunal pli ferm cun il turissem. En il discurs cun la cuminanza d'interess per il turissem en il Grischun (ITG) sco er cun las organisaziuns da branscha hotelleriesuisse Grischun e Telefericas dal Grischun è vegnì percurschì ch'i dovra stentas cuminaivlas. Cun il sustegn dal cussegl turistic dal Grischun vegn lantschà in tema central per ils proxims onns. La finamira è quella da rinforzar la conscienza publica per l'impurtanza dal turissem.

Ulteriurs projects èn en preparaziun
Actualmain èn avant maun in pèr projects cun differents stadis da madiranza. Il cussegl turistic spetga ulteriurs buns projects en il decurs dals proxims mais. Spezialmain empermettentas èn ideas per projects per promover il turissem da stad sco er per meglierar la commerzialisaziun cuminaivla da las purschidas turisticas. Tar mintga promoziun d'in project valan reglas da gieu transparentas e clers criteris. Uschia vegni guardà consequentamain sin la responsabladad economica che sa basa sin in agen engaschament finanzial e temporal. Projects promovids ston cuntegnair aspects novs ed iniziar u accelerar uschia innovaziuns. Il chantun po surpigliar fin a 50 pertschient dals custs da projects impurtants ed innovativs. Ils ulteriurs custs sto la purtadra u il purtader dal project finanziar sez. 
 

Infurmaziuns:
- cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01, e-mail: Jondomenic.Parolini@dvs.gr.ch  
- Eugen Arpagaus, manader da l'uffizi per economia e turissem, tel. 081 257 23 77, telefon mobil 079 256 93 94, e-mail: Eugen.Arpagaus@awt.gr.ch  
 

Gremi: regenza
Funtauna: rg chanzlia chantunala dal Grischun
Neuer Artikel