Cuntegn da la pagina

Scuntrada da las regenzas al Plantahof

  • Erste Mitteilung
  • Neuen Beitrag einfügen

La regenza grischuna retschaiva oz la regenza dal pajais federativ austriac dal Vorarlberg per in discurs da lavur al Plantahof. En il center dals discurs stattan temas sco l'ecologia da selvaschina, il traffic, la sanadad e la furmaziun. 

En la regiun da cunfin dals trais pajais Vorarlberg-Grischun-Liechtenstein èn vegnidas examinadas en la perioda da 2009 fin 2014 l'utilisaziun dal spazi e las activitads da la populaziun dals tschiervs. Las regenzas dal Grischun e dal Vorarlberg vegnan a discutar oz ils resultats da quest studi ed eventualas mesiras da realisaziun. Er vegnan ellas a discutar davart la situaziun actuala en connex cun la tuberculosa tar animals selvadis en l'Austria dal vest sco er davart l'effectiv da lufs. Ulteriurs temas èn il traffic en la Val dal Rain, il barat d'experientschas davart il tema dal provediment medical sco er las mesiras per ina midada da la scolina a la scola populara ch'è adattada als uffants. In ulteriur punct che stat sin il program è la strategia europeica per il territori alpin (Eusalp) ch'è en elavuraziun. Per la regenza grischuna èsi impurtant ch'ils territoris da las Alps centralas sco il Vorarlberg ed il Grischun s'engaschian vinavant cuminaivlamain per rinforzar ils territoris da muntogna e per dar a las regiuns alpinas dapli pais sin plaun europeic.

Suenter il discurs da lavur han lieu ina visita da la nova stalla al Plantahof sco er ina tschaina cuminaivla. Il Grischun ha tradiziunalmain buns contacts cun il Vorarlberg. Las scuntradas da las regenzas han lieu mintga onn. 
 

Fotografias agiuntadas:

-
Guvernatur Markus Wallner e president da la regenza Martin Jäger (a sanestra).

-
Las regenzas dal pajais federativ Vorarlberg e dal chantun Grischun a chaschun da lur scuntrada al Plantahof a Landquart.


Gremi: regenza
Funtauna: rg chanzlia chantunala dal Grischun

Neuer Artikel