Navigaziun principala

Cuntegn da la pagina

"tü-ta-too. L'ureglia sin viadi"

  • Erste Mitteilung
  • Neuen Beitrag einfügen
La nova exposiziun speziala dal museum retic a Cuira è deditgada al tema " tü-ta-too. L'ureglia sin viadi ". L'exposiziun dura dals 1 da matg fin ils 20 da settember 2015. Ina impressiun da l'exposiziun dat in nov video da la chanzlia chantunala dal Grischun sut www.gr.ch.  

Co tuna la Svizra? Tge musica colliain nus cun il Grischun? Co tunan noss dialects regiunals? L'exposiziun ambulanta «tü-ta-too» è a partir dal 1. da matg giast en il museum retic e trametta l'ureglia sin in viadi futuristic tras noss bains culturals sonors. Ils documents da tun ch'èn arcunads en la fonoteca naziunala a Lugano cuntegnan vuschs, ramurs e melodias ch'èn funtaunas unicas da l'istorgia e da la cultura da la Svizra. Cun las tadlar sveglian ellas regurdientschas ed èn ina part da nossa identitad. Las visitadras ed ils visitaders da l'exposiziun vegnan envidads da tschertgar fassettas d'ina patria acustica en ils locals sonors.

L'exposiziun «tü-ta-too» pussibilitescha tras il gieu scuntradas acusticas multifaras sin ina via ch'ins po tscherner sez e che maina tras ils tuns e suns. Ella carmala da gizzar las ureglias e da tadlar concentradamain tuns e suns enconuschents ma er nunenconuschents. Da quai fan part tschient tocs da musica tschernids da tut las direcziuns stilisticas che tanschan da la classica sur la musica populara fin al rock e che derivan da mintga onn dal tschientaner passà. Vi da la «orgla da gieus auditivs» pon ins sulet u en gruppas – sco en il studio da tun – arranschar ramurs dal kino e da la televisiun ad in gieu auditiv. En duas nischas sonoras vegnan ils uffants manads en il reginavel da la fantasia cun paraulas e cun chanzuns. Ulteriurs temas èn perscrutaziuns actualas davart il jazz e davart la musica populara en Svizra sco er la qualitad dal tadlar. In program accumpagnant attractiv, tranter auter cun visitas guidadas tar objects sonors en il museum retic e cun visitas guidadas acusticas tras Cuira, escortescha l'exposiziun speziala. 


Infurmaziuns:
Silvia Conzett, Manadra dal project per l'exposiziun speziala museum retic, tel. 081 257 48 30, E-Mail: Silvia.Conzett@rm.gr.ch  


Gremi: museum retic
Funtauna: rg museum retic
Neuer Artikel