Il museum d'art dal Grischun a Cuira è sin buna via pertutgant las lavurs da construcziun per l'engrondiment e per la renovaziun da la Villa Planta. Suenter che la construcziun brutta è vegnida fatga e suenter che la construcziun d'interiurs progredescha, vegn celebrada oz la festa da ventschida. En in onn vegn il nov museum avert.

En preschientscha dals mastergnants, dals planisaders e da las persunas participadas al project vegn celebrada la festa da ventschida tradiziunala sin il plazzal. Questa occurrenza ha lieu mintgamai uschespert che la construcziun brutta d'in edifizi è terminada ed uschespert che la tetgaglia è construida resp. ch'il tetg è fatg. Grazia al sustegn effectiv e grazia a la buna collavuraziun tranter ils circa 200 mastergnants participads ha la construcziun pudì progredir enfin ussa senza incaps e sin il termin.
La construcziun brutta per l'engrondiment dal museum d'art dal Grischun e la colliaziun sutterrana cun la Villa Planta èn vegnidas terminadas la fin da l'onn 2014. Las installaziuns da tecnica da chasa e la construcziun d'interiurs han cumenzà il principi da l'onn 2015. La fatschada da l'edifizi nov che consista d'elements da betun è vegnida prefabritgada e plazzada cun ina crana sin rodas. En la Villa Planta vegnan actualmain realisadas diversas lavurs sut las puntanadas dal tetg d'urgenza. Las lavurs da construcziun dal nov museum d'art dal Grischun vegnan ad esser terminadas per la fin da l'onn. L'onn nov han lieu la collaudaziun, ils tests integrals e l'endrizzament dal museum per l'avertura il zercladur 2016.

Ina donaziun generusa da 20 milliuns francs ha permess l'onn 2011 da lantschar il project per engrondir il museum d'art dal Grischun a Cuira. Il project per l'edifizi nov è vegnì eruì en ina concurrenza, e deriva dal biro d'architectura Barozzi/Veiga da Barcelona. La renovaziun da la Villa Planta è vegnida fatga tras ils architects Gredig/Walser da Cuira. L'engrondiment e la renovaziun da la Villa Planta rinforzan il museum d'art dal Grischun sco instituziun d'art la pli impurtanta dal Grischun. Il museum duai dentant er esser ina chasa d'impurtanza naziunala, d'ina vart pervia da sia profilaziun cumprovada, da l'autra vart pervia d'exposiziuns temporaras attractivas. Sco chasa d'art promova el principalmain artistas ed artists giuvens dal Grischun.

L'avertura uffiziala dal nov museum d'art ha lieu mesemna, ils 22 da zercladur 2016.
Ulteriuras festas d'avertura e dis da las portas avertas èn previs venderdi, ils 24 da zercladur 2016 sco er la fin d'emna dals 25/26 da zercladur 2016.

Ulteriuras infurmaziuns sin: 
Uffizi da construcziun auta dal Grischun e video

Fotografia agiuntada: Cusseglier guvernativ Mario Cavigelli (amez).


Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail: Mario.Cavigelli@bvfd.gr.ch  
- Markus Dünner, architect chantunal, uffizi da construcziun auta, tel. 081 257 36 31, e-mail: Markus.Duenner@hba.gr.ch  
 

Gremi: departament da construcziun, traffic e selvicultura
Funtauna: rg departament da construcziun, traffic e selvicultura