Pervia dal grond privel da fieu per la cultira e per il guaud relascha l'uffizi da guaud e privels da la natira in scumond absolut da far fieu en tut il Grischun.

Per ils proxims dis vegn puspè prognostitgada in'aura da stad fitg chauda. Pervia da quai crescha il privel da fieu per la cultira e per il guaud anc ina giada. La mancanza da precipitaziuns redaivlas e la chalur il cumenzament da quest mais han chaschunà ch'ils funs dals guauds e che la bostgaglia èn daventads fitg setgs. Sut questas cundiziuns pon fieus facilmain daventar nuncontrollabels e sa derasar fitg svelt.

Pervia dal privel acut d'incendis da guaud èsi absolutamain scumandà en tut il Grischun da far fieu en ils guauds ed en la vischinanza dals guauds. Products da fimar e battafieus na dastgan betg simplamain vegnir bittads davent. Tut las plazzas da grillar en ils guauds ed en la vischinanza dals guauds na dastgan betg vegnir duvradas.

Che la situaziun sa mitigeschia, dastga vegnir spetgà pir suenter plievgias redaivlas. Quantitads da plievgia pli pitschnas sco urizis d'ina u da duas uras u ina leva plievgia na cuntanschan – pervia dal tetg da tschimas – betg il funs dal guaud e na pon uschia betg mitigiar duraivlamain la situaziun. En vista a la festa dal 1. d'avust ston las ordinaziuns da las autoritads communalas e dals pumpiers vegnir observadas strictamain.

Ulteriuras infurmaziuns sco er la valitaziun da la situaziun actuala:
uffizi da guaud e privels da la natira


Infurmaziuns:
Andrea Kaltenbrunner, uffizi da guaud e privels da la natira, tel. 081 257 38 68, Andrea.Kaltenbrunner@awn.gr.ch


Gremi: uffizi da guaud e privels da la natira
Funtauna: rg uffizi da guaud e privels da la natira