Cuntegn da la pagina

Project da pilot per la protecziun da la giuventetgna al festival grischun

  • Erste Mitteilung
  • Neuen Beitrag einfügen
L'uffizi da sanadad dal Grischun realisescha in project da pilot a l'open air Lumnezia En il focus stat la realisaziun da la lescha davart la protecziun da la giuventetgna. Uschia vegnan per exempel fatgs tests, sch'i vegnan vendidas bavrondas alcoholicas a giuvenils, ed i vegnan purschidas scolaziuns per il persunal da vendita.

Las datas dals tests, sch'i vegnan vendidas bavrondas alcoholicas a giuvenils, mussan che spezialmain ad occurrenzas na vegnan las prescripziuns per la vendita d'alcohol betg observadas. Quai vegn fatg per il pli, perquai ch'il persunal da vendita è memia pauc scolà ed ha memia pauca experientscha. Savens èsi difficil d'observar correctamain la protecziun da la giuventetgna pervia da la gronda fulla e pervia da las situaziuns da vendita plain stress. Ultra da quai mussa il rapport da sanadad dal chantun Grischun ch'il baiver sturn pertutga cunzunt la generaziun giuvna, ch'è il public en mira da l'open air. Uschia sa baiva sturn in quart dals giuvens da 15 fin 34 onns almain ina giada per mais. Perquai èsi impurtant da rinforzar la protecziun da la giuventetgna ad occurrenzas.

En il center dal project da pilot stat la realisaziun da la lescha davart la protecziun da la giuventetgna. Uschia na dastgan betg vegnir vendidas bavrondas alcoholicas a giuvenils sut 16 onns, ed a giuvenils sut 18 onns dastgi vegnir consegnà mo biera e vin, ma naginas bavrondas destilladas (spirituosas, aperitivs ed alcopops). Cun scolaziuns che han lieu avant il festival duai il persunal da vendita vegnir sensibilisà d'observar las disposiziuns legalas pertutgant la protecziun da la giuventetgna. Durant il festival vegnan fatgs tests, sch'i vegnan vendidas bavrondas alcoholicas a giuvenils, sut la surveglianza d'ina persuna spezialisada. Ils tests, sch'i vegnan vendidas bavrondas alcoholicas a giuvenils, èn ina registraziun dal stadi actual e n'han betg per consequenza ch'i vegnan prendidas sancziuns giuridicas. Ils resultats dals tests da cumpra vegnan mess a disposiziun al comité d'organisaziun ed a la vischnanca. Cumplementarmain prepara la "Blue Cocktail Bar" coctails senza alcohol ed è represchentada al festival cun in stan da prevenziun.

L'uffizi da sanadad dal Grischun realisescha il project per proteger la giuventetgna en il rom dal program grischun cunter l'alcohol. Il project da pilot vegn organisà en collavuraziun cun il comité d'organisaziun da l'open air Lumnezia, cun la vischnanca da Lumnezia e cun la Crusch blaua dal Grischun. El duai esser in model per ulteriurs festivals e per ulteriuras occurrenzas en il Grischun.

Factsheet protecziun da la giuventetgna a l'open air Lumnezia


Infurmaziuns:
Denise Rudin, uffizi da sanadad, vicemanadra dal program grischun cunter l'alcohol, tel. 081 257 64 02 u 078 746 42 20, e-mail: Denise.Rudin@san.gr.ch   


Gremi: partiziun "promoziun da la sanadad e prevenziun"
Funtauna: rg uffizi da sanadad dal Grischun
Neuer Artikel