Navigaziun principala

Cuntegn da la pagina

Communicaziun da la regenza dals 27 d'avust 2015

  • Erste Mitteilung
  • Neuen Beitrag einfügen
En sia ultima sesida ha la regenza grischuna surdà il premi grischun da cultura 2015 al cineast Christian Schocher. Plinavant ha ella prendì posiziun davart la fundaziun d'ina agentura svizra per la promoziun da l'innovaziun ed ha approvà la revisiun parziala da la planisaziun locala da Churwalden.

Premi grischun da cultura 2015 per Christian Schocher
Christian Schocher survegn il premi grischun da cultura 2015. La regenza grischuna ha surdà il premi grischun da cultura 2015 al cineast da Puntraschigna. Christian Schocher survegn il premi en appreziaziun da sia ovra da la vita sco artist che ha influenzà ed enritgì il film svizzer dal Grischun anora cun films documentars engaschads e cun films dramatics stinads. Il premi è dotà cun 30 000 francs.

-
© Hochparterre AG

Plinavant ha la regenza concedì nov premis da renconuschientscha ed otg premis da promoziun da mintgamai 20 000 francs.

Glista da tut las persunas premiadas

Ils premis vegnan surdads en il rom d'ina festa che ha lieu venderdi, ils 13 da november 2015, a las 17.15 en la sala dal cussegl grond a Cuira.

La regenza beneventa la fundaziun d'ina agentura svizra per la promoziun da l'innovaziun
La regenza grischuna ha prendì posiziun tar la lescha federala davart l'agentura svizra per la promoziun da l'innovaziun (lescha Innosuisse). Cun il project vegnan stgaffidas las basas legalas per transfurmar la cumissiun per tecnologia ed innovaziun (CTI) en in institut da dretg public da la confederaziun. La CTI è l'organ da promoziun da la confederaziun per l'innovaziun scientifica che sa basa sin la scienza. Ella ha l'intent da far ina punt tranter la perscrutaziun ed il martgà e da reunir – cun agid da projects d'innovaziun – interpresas cun instituziuns da perscrutaziun.
La regenza grischuna beneventa la fundaziun d'ina agentura svizra per la promoziun da l'innovaziun e spetga uschia dapli flexibilitad ed in meglier resguard dals basegns da las interpresas. Tar la realisaziun da la lescha Innosuisse stoi dentant vegnir guardà che l'inoltraziun ed il giudicament da las dumondas per projects d'innovaziun na vegnian betg engrevgiads tras process administrativs externs ed interns. Plinavant propona la regenza grischuna da desister d'in cussegl d'innovaziun da 25 persunas e da delegar percunter las incumbensas al cussegl d'administraziun. Uschia pon decisiuns da promoziun vegnir prendidas da maniera pli effizienta ed efficazia.

Mess en vigur la revisiun parziala da la lescha davart ils dretgs politics
La revisiun parziala da lescha davart ils dretgs politics en il chantun Grischun dals 21 d'avrigl 2015 vegn messa en vigur per il 1. da schaner 2016. Tras questa revisiun, che ademplescha ina incumbensa parlamentara, vegni fixà tar tge instanza ch'in recurs cunter las explicaziuns da votaziun dal cussegl grond po vegnir inoltrà.

Mess en vigur la revisiun parziala da la lescha davart ils dis da paus publics

La revisiun parziala da la lescha davart ils dis da paus publics dals 21 d'avrigl 2015 vegn messa en vigur per il 1. da schaner 2016. Tras l'adattaziun da la lescha davart ils dis da paus publics duai vegnir tegnì quint da las relaziuns socialas midadas. Occurrenzas che servan a la sanadad, a la recreaziun, al sport, a la cultura u al divertiment èn permessas a dis da paus publics, cun excepziun dals auts firads, premess ch'ellas na cuntrafetschian betg a l'intent da la lescha. Er ad auts firads èn occurrenzas pussaivlas, ma en general èn ellas suttamessas a l'obligaziun da dumandar ina permissiun da la vischnanca. En il rom da la lescha survegnan las vischnancas la cumpetenza da permetter occurrenzas ad auts firads sin lur territori.

Approvà la revisiun parziala da la planisaziun locala da Churwalden
La regenza approvescha la revisiun parziala da la planisaziun locala da Churwalden, concludida da la vischnanca ils 12 da mars 2015. Quella cumpiglia il plan da zonas ed il plan general da furmaziun 1:1000 "Center da sports da naiv Parpan".
L'object da la revisiun parziala è in center da sports da naiv ch'è planisà en il territori Grossboden. En il center da sports da naiv n'èn betg mo previsas las infrastructuras per il sport da passlung e per la scola da skis, mabain er surfatschas da deposit per il servetsch tecnic communal. Questas surfatschas servan a metter sut tetg ils vehichels ed ils guaffens che vegnan duvrads per mantegnair las infrastructuras turisticas. Per realisar il center da sports da naiv sto ina part da la zona d'agricultura vegnir midada a la zona turistica. Questa enzonaziun vegn cumpensada tras dezonaziuns da la medema surfatscha en il territori Obertor e quai da la zona per edifizis e per stabiliments publics a la zona d'agricultura ed a la zona da l'ulteriur territori communal.

-
© Comet Photoshopping GmbH / Dieter Enz

Concedì contribuziuns chantunalas per l'uniun chantunala da musica

L'uniun chantunala da musica dal Grischun survegn ina contribuziun annuala da 15 000 francs. Per curs specifics vegnan mess a disposiziun maximalmain 20 000 francs per onn. Plinavant vegn prestada ina garanzia da deficit da maximalmain 50 000 francs per onn per las duas emnas da scolaziun da l'orchester da flad da giuventetgna dal Grischun e da la brass band da giuventetgna dal Grischun. Las contribuziuns menziunadas da maximalmain 85 000 francs per onn che vegnan pajadas a l'uniun chantunala da musica dal Grischun valan per ils onns 2016 fin 2019. Quai cun la resalva ch'il cussegl grond concedia mintgamai ils credits respectivs.

Augmentà la contribuziun chantunala per l'associaziun Alzheimer

Per che la secziun grischuna da l'associaziun d'Alzheimer (ALZ GR) possia ademplir las incumbensas delegadas dal chantun, augmenta la regenza la contribuziun chantunala a la ALZ GR da 150 000 francs a 295 000 francs a partir da l'onn 2016. Tras quest augment vegn cuvrì il basegn supplementar cumprovà da 110 pertschients da plazzas (custs da persunal e da gestiun) tar ils posts da cussegliaziun. Tut las autras purschidas furnescha la ALZ GR er vinavant unicamain sin basa d'uffizis d'onur respectivamain cun agid da daners da donaziuns.
La ALZ GR gida a sviluppar ed a mantegnair ina vasta paletta da purschidas e d'agids per la tgira e per l'accumpagnament d'umans cun demenza.


Gremi: regenza
Funtauna: rg chanzlia chantunala dal Grischun
Neuer Artikel