Cuntegn da la pagina

Dis europeics dal monument a Tusaun

  • Erste Mitteilung
  • Neuen Beitrag einfügen
Ils dis europeics dal monument, han lieu sonda, ils 12 da settember, e dumengia, ils 13 da settember 2015. En il Grischun vegn l'occurrenza realisada a Tusaun. In program varià porscha invistas interessantas en il tema "barat– influenza".

Ils dis europeics dal monument 2015 vulan scuvrir las numerusas influenzas dal "ester" en noss patrimoni cultural. En quest connex stat en il focus il tema "barat– influenza". Il chantun Grischun ha bler da porscher davart quest tema. Las vivas relaziuns commerzialas che vegnan tgiradas dapi tschientaners cun l'exteriur vischin e las vias da traffic che pussibiliteschan quai chaschuna in barat multifar en las valladas da las Alps.

Ils dis dal monument vegnan averts uffizialmain sonda, ils 12 da settember 2015, a las 11.00 en la halla da gimnastica veglia a Tusaun. Ils pleds d'avertura vegnan salvads da cusseglier guvernativ Martin Jäger, schef dal departament d'educaziun, cultura e protecziun da l'ambient, da Claudia Kleis, presidenta communala da Tusaun, da Simon Berger, tgirader chantunal da monuments, da Thomas Reitmaier, archeolog chantunal sco er da Ludmila Seifert, mainagestiun da la protecziun da la patria dal Grischun. Diversas visitas guidadas vegnan purschidas a partir da las 12.30 a ed enturn Tusaun. Cumplettà vegn il program la sonda cun ina preschentaziun da films en il kino Rezia.

Per in vast public
Dapi lur emprima realisaziun l'onn 1994 èn ils dis europeics dal monument sa sviluppads a l'occurrenza la pli gronda en il sectur da la tgira da monuments. La finamira da questa occurrenza è quella da sensibilisar in vast public per il mantegniment da bains culturals. Las visitas vegnan organisadas dals posts spezialisads federals, chantunals e municipals per la tgira da monuments e per l'archeologia. Els tschernan mintga onn ils objects, contacteschan las proprietarias ed ils proprietaris ed organiseschan las visitas guidadas e las occurrenzas al lieu.

Il center naziunal d'infurmaziun per il mantegniment dals bains culturals (NIKE) è responsabel per la coordinaziun da las var 200 occurrenzas en l'entira Svizra, per la lavur naziunala da medias e da publicitad sco er per la publicaziun dal program en furma d'ina broschura ed en l'internet. Il di europeic dal monument è ina manifestaziun culturala che vegn lantschada uffizialmain dal cussegl da l'Europa. L'iniziativa vegn er sustegnida da l'Uniun europeica. Il di dal monument ha lieu en 48 pajais europeics.

Ulteriuras infurmaziuns sut: Center naziunal d'infurmaziun per il patrimoni cultural


Infurmaziuns:
Marlene Fasciati, tgira da monuments dal Grischun / uffizi da cultura, tel. 081 257 27 89, e-mail: Marlene.Fasciati@dpg.gr.ch


Gremi: uffizi da cultura
Funtauna: rg uffizi da cultura
Neuer Artikel