En sia ultima sesida ha la regenza decidì da sustegnair mesiras per promover l'electromobilitad. Plinavant ha ella prendì posiziun tar la revisiun parziala 1+ da la lescha federala davart l'aviatica ed ha approvà il project "Protecziun cunter crudada da crappa chombra d'aua Trin Mulin".

Mesiras per promover l'electromobilitad
La regenza sustegna mesiras per promover l'electromobilitad ed ha perquai concludì da laschar elavurar in masterplan per stgaffir en tut il chantun ina rait per chargiar vehichels electrics.
Tras duas intervenziuns parlamentaras correspundentas era la regenza vegnida incumbensada d'examinar las schanzas da l'electromobilitad per il chantun Grischun. Il rapport ch'è ussa avant maun propona las suandantas mesiras prioritaras: extender l'infrastructura per chargiar vehichels electrics, adattar ils criteris d'acquisiziun per l'utilisaziun da vehichels electrics en l'administraziun, construir staziuns da chargiar vehichels electrics tar ils edifizis chantunals sco er organisar events ed occurrenzas d'infurmaziun. Plinavant lascha la regenza elavurar in masterplan per crear l'infrastructura per chargiar vehichels. Tras quest masterplan duain vegnir sustegnidas las activitads da provediturs d'energia e da persunas privatas che han la finamira d'endrizzar infrastructuras per chargiar vehichels electrics. En quest connex stoi vegnir garantì ch'ils vehichels electrics vegnian chargiads cun energia regenerabla indigena, da preferenza cun electricitad producida tras forza idraulica.
Actualmain hai mo fitg paucs vehichels puramain electrics en il Grischun, numnadamain mo stgars 100. Vehichels ibrids (vul dir vehichels che cumbineschan in motor da combustiun cun in motor electric) hai in pau dapli. A favur da dapli vehichels electrics pledan differents arguments: L'electromobilitad è ina schanza per substituir ils purtaders d'energia fossila e porscha pussaivladads per metter a disposiziun l'electricitad necessaria tras purtaders d'energia regenerabla, en spezial tras la forza idraulica indigena. Vehichels electrics na contamineschan betg l'ambient cun substanzas nuschaivlas, na fan betg canera ed augmentan l'independenza da furniturs da materias primas.

Ulteriuras infurmaziuns: uffizi d'energia e da traffic

Consultaziun tar la revisiun parziala 1+ da la lescha federala davart l'aviatica
La regenza grischuna ha prendì posiziun tar la revisiun parziala 1+ da la lescha federala davart l'aviatica. Il project da consultaziun ha l'intent d'augmentar il nivel da segirezza, la cumpetitivitad e l'effizienza. Per plazzas aviaticas è previsa ina nova procedura differenziada per ils concessiunaments e per las permissiuns. Quella resguarda meglier ils differents basegns e las differentas pretensiuns dals singuls stabiliments. Uschia vegnan per exempel plazzas d'atterrar d'ospitals, che vegnan duvradas intensivamain, taxadas da nov sco champs d'aviatica, cun la consequenza che la confederaziun è cumpetenta per la procedura da permissiun. La regenza grischuna beneventa questa soluziun, perquai che las plazzas d'atterrar d'ospitals èn per regla situadas en territoris fitg populads. Cun ina regulaziun transitorica da 15 onns èsi garantì ch'ils ospitals pertutgads hajan temp avunda per realisar il nov dretg. Quai è impurtant, per che la gestiun da las plazzas d'atterrar d'ospitals existentas saja garantida er vinavant, malgrà l'obligaziun d'avair ina permissiun. Pervia da las relaziuns regiunalas e geograficas èn las plazzas d'atterrar dals ospitals en il Grischun d'ina impurtanza decisiva per il provediment da la populaziun e dals giasts da vacanzas.
Plinavant prevesa la revisiun da classifitgar las concessiuns da gestiun per plazzas aviaticas en trais differentas categorias e betg da dar ina concessiun unitara sco fin ussa. Questa nova classificaziun vegn medemamain sustegnida da la regenza. Quai vala en spezial en vista a l'eroport da Samedan che duai vegnir attribuì a la categoria C. Per eroports da la categoria C valan pretensiuns tecnicas pli pitschnas. Sgols regulars e sgols da charter èn pussaivels, ma cuntrari als eroports da las categorias A e B dentant betg absolutamain necessaris. Qua tras resultan per l'eroport da Samedan libertads d'agir pli grondas en quai che reguarda il manaschi. Uschia na sto l'eroport per exempel betg esser avert durant l'entir onn e po prevair differentas uras da manaschi tut tenor la stagiun. En cas che l'infrastructura vegn extendida, ha l'eroport da Samedan plinavant la pussaivladad da survegnir ina concessiun da la categoria B.

Project "Protecziun cunter crudada da crappa chombra d'aua Trin Mulin"
La regenza ha approvà il project "Protecziun cunter crudada da crappa chombra d'aua Trin Mulin" ed ha concedì ina contribuziun chantunala dad 87 400 francs. Sur Trin Mulin è vegnida construida l'onn 1906 ina chombra d'aua che vegn duvrada d'ina vart da la vischnanca per il provediment d'aua da baiver e da l'autra vart da l'Ovra electrica Tumein per la producziun d'energia en la centrala Trin Mulin. L'access a la chombra d'aua maina tras ina chavorgia da grip che vegn segirada regularmain cun rumir la grippa ch'è sa distatgada. A chaschun da las lavurs da rumida da quest onn è vegnì chattà in toc grip instabil pli grond. Cunquai ch'il geolog consultà ha giuditgà la situaziun actuala sco privlusa, ha la vischnanca da Trin incumbensà l'uffizi da guaud e privels da la natira d'examinar e d'elavurar mesiras tecnicas per reducir la situaziun da privel. Il toc grip instabil vegn segirà anc quest onn cun stender suravi ina rait.