Cuntegn da la pagina

Las mattas ed ils mats s'infurmeschan davart lur futur

  • Erste Mitteilung
  • Neuen Beitrag einfügen
Mez november 2015 ha lieu il Di naziunal da l'avegnir. Las mattas ed ils mats han pia puspè la pussaivladad da midar vart. A medem temp organisescha il post da stab per l'egualitad da las schanzas per la segunda giada il parlament grischun da mattas. Las mattas ed ils mats interessads pon s'annunziar per las differentas occurrenzas.

Di naziunal da l'avegnir
Il Di naziunal da l'avegnir ils 12 da november 2015 porscha a las mattas ed als mats da la 5. fin 7. classa la pussaivladad da dar in sguard en professiuns nuntipicas per lur schlattaina. Per l'ina envidan passa 30 interpresas ad ina visita. Per l'autra porschan intgins manaschis ed intginas organisaziuns projects spezials per mats e per mattas. La scola auta da pedagogia dal Grischun per exempel renda enconuschent als mats la professiun da magister sut il titel "Aventura dar scola". L'atelier chantunal per creaziun da vestgadira sa drizza als mats che vulan far valair lur potenzial creativ. Ulteriurs projects spezials per las mattas porschan intginas scrinarias en il chantun, la firma distec a Mustér sco er la scola spezialisada superiura da la Svizra sidorientala (IFSP) a Cuira.

Annunzias per il Di naziunal da l'avegnir: www.nationalerzukunftstag.ch

Parlament grischun da mattas
Il parlament grischun da mattas dat a mattas da 13 fin 16 onns la schanza d'agir durant in entir di sco deputadas. En la sala dal cussegl grond a Cuira debatteschan ellas ils 12 da november 2015 davart temas ch'ellas tschernan sezzas, fan dumondas a la regenza ed inoltreschan petiziuns al cussegl grond. Las mattas vegnan accumpagnadas da menturas e da menturs. Cun quest parlament vul il post da stab per l'egualitad da las schanzas mussar quant impurtant ch'igl è da svegliar baud l'interess per l'activitad e per la participaziun politica, cunzunt tar las mattas e tar las dunnas. Las mattas interessadas pon s'annunziar anc fin ils 5 d'october 2015 per il parlament grischun da mattas.

Annunzias per il 2. parlament grischun da mattas: post da stab per l'egualitad da las schanzas


Infurmaziuns:
Silvia Hofmann, manadra dal post da stab per l'egualitad da las schanzas, tel. 081 257 35 71, e-mail: Silvia.Hofmann@stagl.gr.ch  


Gremi: post da stab per l'egualitad da las schanzas
Funtauna: rg post da stab per l'egualitad da las schanzas
Neuer Artikel