Cuntegn da la pagina

Plazzament ed assistenza da fugitivas e fugitivs minorens

  • Erste Mitteilung
  • Neuen Beitrag einfügen
La regenza prenda enconuschientscha dal concept per il plazzament e per l'assistenza da fugitivas e fugitivs minorens. Sco emprima mesira surdat ella ina incarica da prestaziun a la fundaziun "Gott hilft" per manar ina purschida d'abitar e d'assistenza.

En il rom dal concept "Uffants e giuvenils betg accumpagnads (requirents d'asil e fugitivs) en il chantun Grischun" èn vegnidas examinadas diversas variantas per accumpagnar, per assister, per proteger e per integrar en il chantun Grischun fugitivas e fugitivs minorens betg accumpagnads. Ordinadas tenor la schlattaina e la vegliadetgna dals uffants e giuvenils betg accumpagnads, tranter quels er persunas giuvnas creschidas da fin 25 onns, vegnan ussa messas a disposiziun furmas da plazzament e d'assistenza adequatas. Ina gronda part dals uffants e giuvenils betg accumpagnads survegn in dretg da restar duraivlamain en Svizra. Per che questas persunas giuvnas survegnian ina perspectiva a pli lunga vista en Svizra e na daventian – per mancanza d'integraziun – ils onns proxims betg ina chargia finanziala per il stadi social e per il stadi da dretg, èsi indispensabel da prender mesiras d'assistenza, d'accumpagnament e d'integraziun che han ina clera structura.

In'emprima purschida per il plazzament e per l'assistenza da persunas minorennas betg accumpagnadas è ussa avant maun. La regenza approvescha ina incarica da prestaziun tranter il chantun Grischun e la fundaziun "Gott hilft". En ina immobiglia da la fundaziun a Favugn duain vegnir recepids ed assistids 12 requirents d'asil e fugitivs minorens. Actualmain concretisescha il chantun il basegn da purschidas da plazzament e d'assistenza ed è en tractativas cun eventuals ulteriurs purschiders da servetschs.

La vischnanca da Favugn organisescha per la populaziun in'occurrenza d'orientaziun davart quest tema. Gievgia, il 1. d'october a las 20.00, ha lieu ina radunanza en l'aula. Ulteriuras infurmaziuns davart questa occurrenza dat Lucrezia Furrer, presidenta communala da Favugn, sut 081 253 38 36.


Infurmaziuns:

- cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01 (da las 11.00 fin las 14.00), e-mail: Jondomenic.Parolini@dvs.gr.ch  
- Andrea Ferroni, manader da l'uffizi dal servetsch social, tel. 081 257 26 54, e-mail: Andrea.Ferroni@soa.gr.ch  


Gremi: regenza
Funtauna: rg chanzlia chantunala dal Grischun
Neuer Artikel