Cuntegn da la pagina

La curt roiala da Zizers – avertura dal parc archeologic

  • Erste Mitteilung
  • Neuen Beitrag einfügen
Sonda, ils 24 d'october vegn preschentà a Zizers a la publicitad in parc archeologic enturn la curt roiala da Zizers. L'onn 2003 èn vegnidas scuvridas las restanzas d'in edifizi monumental da crap sin il prà "Schlossbungert" en il center da Zizers, e quai a chaschun da lavurs da construcziun. Vastas exchavaziuns da salvament tras il servetsch archeologic dal Grischun durant ils onns 2009 fin 2014 han pudì identifitgar il monument sco curt roiala carolingic-ottonica.

Rescuverta d'ina curt roiala

Durant ils ultims 6 onns ha il servetsch archeologic dal Grischun exchavà en il center da Zizers restanzas d'in edifizi extraordinari che datescha dal 8. fin 11. tschientaner. Emprimas ruinas ed emprims mirs èn vegnids scuvrids per cas gia l'onn 2003 a chaschun da lavurs da construcziun ed han alura pudì vegnir identifitgads sco curt roiala dad Otto I. (912 - 973). Uschia è la curt roiala carolingic-ottonica da Zizers in monument archeologic extraordinari per il chantun Grischun, ma er per tut la Svizra. Fin ussa n'hai betg dà insatge cumparegliabel en Svizra, tant ch'il monument è – dal tuttafatg cun raschun – d'ina impurtanza naziunala.

Salvament a forzas unidas

Igl è reussì da mantegnair l'object istoric smanatschà per las generaziuns vegnintas. Il grond engaschament da la confederaziun, dal chantun e da la vischnanca han permess – cun contribuziuns considerablas – d'acquistar il territori da construcziun pertutgà e da conservar il stabiliment en la terra. En stretga collavuraziun cun la vischnanca da Zizers è vegnì elavurà a partir da l'onn 2012 in concept d'intermediaziun e da furmaziun.

Parc archeologic a Zizers
In element central da la visualisaziun archeologica è il plan reconstruì da l'edifizi central. Quest plan è vegnì marcà per terra cun strivlas da metal e l'impressiun dal spazi vegn dada tras in'emplantaziun verda. Simpels corpus per seser envidan la populaziun indigena sco er ils giasts da far ina pausa. Ils fatgs istorics sco er ils resultats ils pli impurtants da las exchavaziuns figureschan sin trais grondas tavlas d'infurmaziun ed animeschan las visitadras ed ils visitaders da far in tur. Cun in'avertura festiva dal parc archeologic sonda, ils 24 d'october 2015, a las 10.00, tras il president da la regenza Martin Jäger, terminescha in project cuminaivel da la confederaziun, dal chantun e da la vischnanca.

Fotografia agiuntada:
-

-
Il parc archeologic enturn la curt roiala da Zizers.


Infurmaziuns:
-Thomas Reitmaier, archeolog chantunal, tel. 081 257 48 60, e-mail: Thomas.Reitmaier@adg.gr.ch  
- Peter Lang, president communal da Zizers, tel. 081 300 09 15, e-mail: peter.lang@zizers.ch  


Gremi: servetsch archeologic dal Grischun
Funtauna: rg servetsch archeologic dal Grischun
Neuer Artikel